[318] Etābhinandāmi vaco mahesino sukittitaṃ gotama nūpadhīkaṃ yesīdha diṭṭhaṃva sutaṃ mutaṃ vā sīlabbataṃ vāpi pahāya sabbaṃ anekarūpampi pahāya sabbaṃ taṇhaṃ pariññāya anāsavā ye ahampi te oghatiṇṇāti brūmi.

[319] Etābhinandāmi vaco mahesinoti etanti tuyhaṃ vacanaṃ byapathaṃ desanaṃ anusandhiṃ nandāmi abhinandāmi modāmi anumodāni icchāmi sādiyāmi patthayāmi pihayāmi abhijappāmi . mahesinoti [1]- mahesī bhagavā . mahantaṃ sīlakkhandhaṃ esi gavesi pariyesīti mahesī .pe. Kahaṃ devadevo kahaṃ narāsabhoti mahesīti etābhinandāmi vaco mahesino.

[320] Sukittitaṃ gotama nūpadhīkanti sukittitanti suācikkhitaṃ sudesitaṃ supaññapitaṃ supaṭṭhapitaṃ suvivaritaṃ suvibhattaṃ suuttānīkataṃ supakāsitaṃ . gotama nūpadhīkanti upadhī vuccanti kilesā ca khandhā ca abhisaṅkhārā ca . upadhipahānaṃ upadhivūpasamo upadhipaṭinissaggo upadhipaṭippassaddhi amataṃ nibbānanti sukittitaṃ gotama nūpadhīkaṃ.

[321] Yesīdha diṭṭhaṃva sutaṃ mutaṃ vā sīlabbataṃ vāpi pahāya sabbanti ye sabbā diṭṭhasuddhiyo pahāya pajahitvā vinodetvā byantīkaritvā anabhāvaṅgametvā ye sabbā sutasuddhiyo ye sabbā diṭṭhasutasuddhiyo ye sabbā mutasuddhiyo ye sabbā sīlasuddhiyo ye sabbā vattasuddhiyo ye sabbā sīlabbattasuddhiyo pahāya pajahitvā vinodetvā byantīkaritvā anabhāvaṅgametvāti yesīdha diṭṭhaṃva sutaṃ mutaṃ vā sīlabbataṃ vāpi pahāya sabbaṃ.