[171] Kathaṃ catudhammavavatthāne paññā bhūminānatte ñāṇaṃ . Catasso bhūmiyo kāmāvacarā bhūmi rūpāvacarā bhūmi arūpāvacarā bhūmi apariyāpannā bhūmi.

[172] Katamā kāmāvacarā bhūmi heṭṭhato avīcinirayaṃ pariyantaṃ karitvā uparito paranimmitavasavattī deve anto karitvā yaṃ etasmiṃ anatre etthāvacarā ettha pariyāpannā khandhadhātu āyatanā rūpā vedanā saññā saṅkhārā viññāṇaṃ ayaṃ kāmāvacarā bhūmi.

[173] Katamā rūpāvacarā bhūmi heṭṭhato brahmalokaṃ pariyantaṃ karitvā uparito akaniṭṭhe deve anto karitvā yaṃ etasmiṃ antare etthāvacarā ettha pariyāpannā samāpannassa vā upapannassa Vā diṭṭhadhammasukhavihārassa vā cittacetasikā dhammā ayaṃ rūpāvacarā bhūmi.

[174] Katamā arūpāvacarā bhūmi heṭṭhato ākāsānañcāyatanūpage deve pariyantaṃ karitvā uparito nevasaññānāsaññāyatanūpage deve anto karitvā yaṃ etasmiṃ antare ettha pariyāpannā samāpannassa vā upapannassa vā diṭṭhadhammasukhavihārassa vā cittacetasikā dhammā ayaṃ arūpāvacarā bhūmi.