[269] Katamaṃ tathāgatassa indriyānaṃ paropariyatte ñāṇaṃ . Idha tathāgato satte passati apparajakkhe mahārajakkhe tikkhindriye mudindriye svākāre dvākāre suviññāpaye duviññāpaye appekacce paralokavajjabhayadassāvino appekacce naparalokavajjabhayadassāvino.

[270] Apparajakkhe mahārajakkheti saddho puggalo apparajakkho assaddho puggalo mahārajakkho āraddhaviriyo puggalo apparajakkho kusīto puggalo mahārajakkho upaṭṭhitassati puggalo apparajakkho muṭṭhassati puggalo mahārajakkho samāhito puggalo apparajakkho asamāhito puggalo mahārajakkho paññavā puggalo apparajakkho duppañño puggalo mahārajakkho.

[271] Tikkhindriye mudindriyeti saddho puggalo tikkhindriyo assaddho puggalo mudindriyo āraddhaviriyo puggalo tikkhindriyo kusīto puggalo mudindriyo upaṭṭhitassati puggalo tikkhindriyo muṭṭhassati puggalo mudindriyo samāhito puggalo tikkhindriyo asamāhito puggalo mudindriyo paññavā puggalo tikkhindriyo duppañño puggalo mudindriyo.

[272] Svākāre dvākāreti saddho puggalo svākāro assaddho puggalo dvākāro āraddhaviriyo puggalo svākāro kusīto puggalo dvākāro upaṭṭhitassati puggalo svākāro Muṭṭhassati puggalo dvākāro samāhito puggalo svākāro asamāhito puggalo dvākāro paññavā puggalo svākāro duppañño puggalo dvākāro.