[286] Katamaṃ tathāgatassa sabbaññutañāṇaṃ . sabbasaṅkhatamasaṅkhataṃ anavasesaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ anāgataṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ atītaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ paccuppannaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ cakkhuñceva rūpā ca evaṃ taṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ sotañceva saddā ca .pe. ghānañceva gandhā ca jivhā ceva rasā ca kāyo ceva phoṭṭhabbā ca mano Ceva dhammā ca evaṃ taṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ.

[287] Yāvatā aniccaṭṭhaṃ dukkhaṭṭhaṃ anattaṭṭhaṃ [1]- sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā rūpassa aniccaṭṭhaṃ dukkhaṭṭhaṃ anattaṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā vedanāya yāvatā saññāya yāvatā saṅkhārānaṃ yāvatā viññāṇassa yāvatā cakkhussa .pe. jarāmaraṇassa aniccaṭṭhaṃ dukkhaṭṭhaṃ anattaṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ.

[288] Yāvatā abhiññāya abhiññaṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā pariññāya pariññaṭṭhaṃ yāvatā pahānāya pahānaṭṭhaṃ yāvatā bhāvanāya bhāvanaṭṭhaṃ yāvatā sacchikiriyāya sacchikiriyaṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā khandhānaṃ khandhaṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā dhātūnaṃ dhātaṭṭhaṃ yāvatā āyatanānaṃ āyatanaṭṭhaṃ yāvatā saṅkhatānaṃ saṅkhataṭṭhaṃ yāvatā asaṅkhatassa asaṅkhataṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ.