[294] Kati diṭṭhiṭṭhānāni kati diṭṭhipariyuṭṭhānāni kati diṭṭhiyo kati diṭṭhābhinivesā katamo diṭṭhiṭṭhānasamugghāto kati abhinivesaparāmāso diṭṭhi. {294.1} Kati diṭṭhiṭṭhānānīti aṭṭha diṭṭhiṭṭhānāni . kati diṭṭhipariyuṭṭhānānīti aṭṭhārasa diṭṭhipariyuṭṭhānāni . kati diṭṭhiyoti soḷasa diṭṭhiyo . kati diṭṭhābhinivesāti tiṃsasataṃ diṭṭhābhinivesā . Katamo diṭṭhiṭṭhānasamugghātoti sotāpattimaggo diṭṭhiṭṭhānasamugghāto.

[295] Kati abhinivesaparāmāso diṭṭhīti rūpaṃ etaṃ mama esohamasmi eso me attāti abhinivesaparāmāso diṭṭhi vedanaṃ etaṃ mama .pe. saññaṃ etaṃ mama saṅkhāre etaṃ mama viññāṇaṃ etaṃ mama esohamasmi eso me attāti abhinivesaparāmāso diṭṭhi. Cakkhuṃ etaṃ mama sotaṃ etaṃ mama ghānaṃ etaṃ mama jivhaṃ etaṃ mama kāyaṃ etaṃ mama manaṃ etaṃ mama esohamasmi eso me attāti abhinivesaparāmāso diṭṭhi . rūpaṃ etaṃ mama saddaṃ etaṃ mama gandhaṃ etaṃ mama rasaṃ etaṃ mama phoṭṭhabbaṃ etaṃ mama dhammaṃ etaṃ mama esohamasmi eso me attāti abhinivesaparāmāso diṭṭhi.

[296] Cakkhuviññāṇaṃ etaṃ mama sotaviññāṇaṃ etaṃ mama ghānaviññāṇaṃ etaṃ mama jivhāviññāṇaṃ etaṃ mama kāyaviññāṇaṃ etaṃ mama manoviññāṇaṃ etaṃ mama esohamasmi eso me attāti abhinivesaparāmāso diṭṭhi . cakkhusamphassaṃ etaṃ mama sotasamphassaṃ etaṃ mama ghānasamphassaṃ etaṃ mama jivhāsamphassaṃ etaṃ mama kāyasamphassaṃ etaṃ mama manosamphassaṃ etaṃ mama esohamasmi eso me attāti abhinivesaparāmāso diṭṭhi . cakkhusamphassajaṃ vedanaṃ sotasamphassajaṃ vedanaṃ ghānasamphassajaṃ vedanaṃ jivhāsamphassajaṃ vedanaṃ kāyasamphassajaṃ vedanaṃ manosamphassajaṃ Vedanaṃ etaṃ mama esohamasmi eso me attāti abhinivesaparāmāso diṭṭhi.

[297] Rūpasaññaṃ etaṃ mama saddasaññaṃ gandhasaññaṃ rasasaññaṃ phoṭṭhabbasaññaṃ etaṃ mama esohamasmi eso me attāti abhinivesaparāmāso diṭṭhi . rūpasañcetanaṃ etaṃ mama saddasañcetanaṃ gandhasañcetanaṃ rasasañcetanaṃ phoṭṭhabbasañcetanaṃ dhammasañcetanaṃ etaṃ mama esohamasmi eso me attāti abhinivesaparāmāso diṭṭhi . rūpataṇhaṃ etaṃ mama saddataṇhaṃ etaṃ mama gandhataṇhaṃ rasataṇhaṃ phoṭṭhabbataṇhaṃ etaṃ mama esohamasmi eso me attāti abhinivesaparāmāso diṭṭhi . rūpavitakkaṃ etaṃ mama saddavitakkaṃ gandhavitakkaṃ rasavitakkaṃ phoṭṭhabbavitakkaṃ dhammavitakkaṃ etaṃ mama esohamasmi eso me attāti abhinivesaparāmāso diṭṭhi . rūpavicāraṃ etaṃ mama saddavicāraṃ etaṃ mama gandhavicāraṃ etaṃ mama rasavicāraṃ etaṃ mama phoṭṭhabbavicāraṃ etaṃ mama dhammavicāraṃ etaṃ mama esohamasmi eso me attāti abhinivesaparāmāso diṭṭhi.