[633] Evamme sutaṃ ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . atha kho āyasmā ānando yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinno kho āyasmā ānando bhagavantaṃ etadavoca suñño loko suñño lokoti bhante Vuccati kittāvatā nu kho bhante suñño lokoti vuccatīti . Yasmā kho ānanda suññaṃ attena vā attaniyena vā tasmā suñño lokoti vuccati kiñcānanda suññaṃ attena vā attaniyena vā cakkhuṃ kho ānanda suññaṃ attena vā attaniyena vā rūpā suññā attena vā attaniyena vā cakkhuviññāṇaṃ suññaṃ attena vā attaniyena vā cakkhusamphasso suñño attena vā attaniyena vā yampidaṃ cakkhusamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi suññaṃ attena vā attaniyena vā sotaṃ suññaṃ .pe. saddā suññā ghānaṃ suññaṃ gandhā suññā jivhā suññā rasā suññā kāyo suñño phoṭṭhabbā suññā mano suñño attena vā attaniyena vā dhammā suññā attena vā attaniyena vā manoviññāṇaṃ suññaṃ attena vā attaniyena vā manosamphasso suñño attena vā attaniyena vā yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi suññaṃ attena vā attaniyena vā yasmā kho ānanda suññaṃ attena vā attaniyena vā tasmā suñño lokoti vuccatīti.

[634] Suññaṃ suññaṃ saṅkhārasuññaṃ vipariṇāmasuññaṃ aggasuññaṃ lakkhaṇasuññaṃ vikkhambhanasuññaṃ tadaṅgasuññaṃ samucchedasuññaṃ paṭippassaddhisuññaṃ nissaraṇasuññaṃ Ajjhattasuññaṃ bahiddhāsuññaṃ dubhatosuññaṃ sabhāgasuññaṃ visabhāgasuññaṃ esanāsuññaṃ pariggahasuññaṃ paṭilābhasuññaṃ paṭivedhasuññaṃ ekattasuññaṃ nānattasuññaṃ khantisuññaṃ adhiṭṭhānasuññaṃ pariyogāhanasuññaṃ sampajānassa pavattapariyādānaṃ sabbasuññatānaṃ paramaṭṭhasuññaṃ.