[718] Tīṇīmāni bhikkhave pāṭihāriyāni katamāni tīṇi iddhipāṭihāriyaṃ ādesanāpāṭihāriyaṃ anusāsanīpāṭihāriyaṃ.

[719] Katamañca bhikkhave iddhipāṭihāriyaṃ idha bhikkhave ekacco anekavihitaṃ iddhividhaṃ paccanubhoti ekopi hutvā bahudhā Hoti bahudhāpi hutvā eko hoti āvibhāvaṃ tirobhāvaṃ .pe. Yāva brahmalokāpi kāyena vasaṃ vatteti idaṃ vuccati bhikkhave iddhipāṭihāriyaṃ.

[720] Katamañca bhikkhave ādesanāpāṭihāriyaṃ idha bhikkhave ekacco nimittena ādisati evampi te mano itthampi te mano itipi te cittanti so bahuñcepi ādisati tatheva taṃ hoti no aññathā idha pana bhikkhave ekacco na heva kho nimittena ādisati api ca kho manussānaṃ vā amanussānaṃ vā devānaṃ vā saddaṃ sutvā ādisati evampi te mano itthampi te mano itipi te cittanti so bahuñcepi ādisati tatheva taṃ hoti no aññathā idha pana bhikkhave ekacco na heva kho nimittena ādisati napi manussānaṃ vā amanussānaṃ vā devānaṃ vā saddaṃ sutvā ādisati api ca kho vitakkayato vicārayato vitakkavicārasaddaṃ sutvā ādisati evampi te mano itthampi te mano itipi te cittanti so bahuñcepi ādisati tatheva taṃ hoti no aññathā idha pana bhikkhave ekacco na heva kho nimittena ādisati napi manussānaṃ vā amanussānaṃ vā devānaṃ vā saddaṃ sutvā ādisati na vitakkayato vicārayato vitakkavicārasaddaṃ sutvā ādisati api ca kho avitakkaṃ avicāraṃ samādhiṃ samāpannassa cetasā ceto paricca pajānāti yathā imassa bhoto Manosaṅkhārā paṇihitā tathā imassa cittassa anantarā amunnāma vitakkaṃ vitakkessatīti so bahuñcepi ādisati tatheva taṃ hoti no aññathā idaṃ vuccati bhikkhave ādesanāpāṭihāriyaṃ.

[721] Katamañca bhikkhave anusāsanīpāṭihāriyaṃ idha pana bhikkhave ekacco evaṃ anusāsati evaṃ vitakketha mā evaṃ vitakkayittha evaṃ manasi karotha mā evaṃ manasākarittha idaṃ pajahatha idaṃ upasampajja viharathāti idaṃ vuccati bhikkhave anusāsanīpāṭihāriyaṃ imāni kho bhikkhave tīṇi pāṭihāriyāni.