[289] Yāvatā kusale dhamme sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā akusale dhamme yāvatā abyākate dhamme yāvatā kāmāvacare dhamme yāvatā rūpāvacare dhamme yāvatā arūpāvacare dhamme yāvatā apariyāpanne dhamme sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā dukkhassa dukkhaṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā samudayassa samudayaṭṭhaṃ yāvatā nirodhassa nirodhaṭṭhaṃ yāvatā maggassa maggaṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ.

[290] Yāvatā atthapaṭisambhidāya atthapaṭisambhidaṭṭhaṃ sabbaṃ jānātīti sabbaññutañāṇaṃ tattha .pe. yāvatā dhammapaṭisambhidāya dhammapaṭisambhidaṭṭhaṃ yāvatā niruttipaṭisambhidāya niruttipaṭisambhidaṭṭhaṃ yāvatā paṭibhāṇapaṭisambhidāya paṭibhāṇapaṭisambhidaṭṭhaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā indriyaparopariyatte ñāṇaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ yāvatā sattānaṃ āsayānusaye ñāṇaṃ yāvatā yamakapāṭihire ñāṇaṃ yāvatā mahākaruṇāsamāpattiyā ñāṇaṃ sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ.

[291] Yāvatā sadevakassa lokassa samārakassa sabrahmakassa sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā sabbaṃ jānātīti sabbaññutañāṇaṃ tattha āvaraṇaṃ natthīti anāvaraṇaṃ ñāṇaṃ. Na tassa adiṭṭhamidhatthi kiñci atho aviññātamajānitabbaṃ sabbaṃ abhiññāsi yadatthi neyyaṃ tathāgato tena ( samayena ) samantacakkhūti.

[292] Samantacakkhūti kenatthena samantacakkhu . cuddasa buddhañāṇāni dukkhe ñāṇaṃ buddhañāṇaṃ dukkhasamudaye ñāṇaṃ buddhañāṇaṃ dukkhanirodhe ñāṇaṃ buddhañāṇaṃ dukkhanirodhagāminiyā paṭipadāya ñāṇaṃ buddhañāṇaṃ atthapaṭisambhide ñāṇaṃ buddhañāṇaṃ dhammapaṭisambhide ñāṇaṃ buddhañāṇaṃ niruttipaṭisambhide ñāṇaṃ buddhañāṇaṃ paṭibhāṇapaṭisambhide ñāṇaṃ buddhañāṇaṃ indriyaparopariyatte ñāṇaṃ buddhañāṇaṃ sattānaṃ āsayānusaye ñāṇaṃ buddhañāṇaṃ yamakapāṭihire ñāṇaṃ buddhañāṇaṃ mahākaruṇāsamāpattiyā ñāṇaṃ buddhañāṇaṃ sabbaññutañāṇaṃ buddhañāṇaṃ anāvaraṇañāṇaṃ buddhañāṇaṃ imāni cuddasa buddhañāṇāni imesaṃ cuddasannaṃ buddhañāṇānaṃ ādito aṭṭha ñāṇāni sāvakasādhāraṇāni cha ñāṇāni asādhāraṇāni sāvakehi.