[302] Kāmadhātuṃ etaṃ mama rūpadhātuṃ etaṃ mama arūpadhātuṃ etaṃ mama kāmabhavaṃ etaṃ mama rūpabhavaṃ etaṃ mama saññābhavaṃ etaṃ mama asaññābhavaṃ etaṃ mama nevasaññānāsaññābhavaṃ etaṃ mama ekavokārabhavaṃ etaṃ mama catuvokārabhavaṃ etaṃ mama pañcavokārabhavaṃ etaṃ mama paṭhamajjhānaṃ etaṃ mama dutiyajjhānaṃ etaṃ mama tatiyajjhānaṃ etaṃ mama catutthajjhānaṃ etaṃ mama mettācetovimuttiṃ etaṃ mama karuṇācetovimuttiṃ etaṃ mama muditācetovimuttiṃ etaṃ mama upekkhācetovimuttiṃ etaṃ mama ākāsānañcāyatanasamāpattiṃ viññāṇañcāyatanasamāpattiṃ ākiñcaññāyatanasamāpattiṃ nevasaññānāsaññāyatanasamāpattiṃ etaṃ mama esohamasmi eso me attāti abhinivesaparāmāso diṭṭhi.

[303] Avijjaṃ etaṃ mama saṅkhāre etaṃ mama viññāṇaṃ etaṃ mama nāmarūpaṃ etaṃ mama saḷāyatanaṃ etaṃ mama phassaṃ etaṃ mama vedanaṃ etaṃ mama taṇhaṃ etaṃ mama upādānaṃ etaṃ mama bhavaṃ etaṃ Mama jātiṃ etaṃ mama jarāmaraṇaṃ etaṃ mama esohamasmi eso me attāti abhinivesaparāmāso diṭṭhi evaṃ abhinivesaparāmāso diṭṭhi.

[304] Katamāni aṭṭha diṭṭhiṭṭhānāni . khandhāpi diṭṭhiṭṭhānaṃ avijjāpi diṭṭhiṭṭhānaṃ phassopi diṭṭhiṭṭhānaṃ saññāpi diṭṭhiṭṭhānaṃ vitakkāpi diṭṭhiṭṭhānaṃ ayonisomanasikāropi diṭṭhiṭṭhānaṃ pāpamittopi diṭṭhiṭṭhānaṃ paratoghosopi diṭṭhiṭṭhānaṃ. {304.1} Khandhā hetu khandhā paccayo diṭṭhiṭṭhānaṃ upādāya samuṭṭhānaṭṭhena evaṃ khandhāpi diṭṭhiṭṭhānaṃ avijjā hetu avijjā paccayo diṭṭhiṭṭhānaṃ upādāya samuṭṭhānaṭṭhena evaṃ avijjāpi diṭṭhiṭṭhānaṃ phasso hetu phasso paccayo diṭṭhiṭṭhānaṃ upādāya samuṭṭhānaṭṭhena evaṃ phassopi diṭṭhiṭṭhānaṃ saññā hetu saññā paccayo diṭṭhiṭṭhānaṃ upādāya samuṭṭhānaṭṭhena evaṃ saññāpi diṭṭhiṭṭhānaṃ vitakkā hetu vitakkā paccayo diṭṭhiṭṭhānaṃ upādāya samuṭṭhānaṭṭhena evaṃ vitakkāpi diṭṭhiṭṭhānaṃ ayonisomanasikāro hetu ayonisomanasikāro paccayo diṭṭhiṭṭhānaṃ upādāya samuṭṭhānaṭṭhena evaṃ ayonisomanasikāropi diṭṭhiṭṭhānaṃ pāpamitto hetu pāpamitto paccayo diṭṭhiṭṭhānaṃ upādāya samuṭṭhānaṭṭhena evaṃ pāpamittopi diṭṭhiṭṭhānaṃ paratoghoso hetu paratoghoso paccayo diṭṭhiṭṭhānaṃ upādāya samuṭṭhānaṭṭhena evaṃ Paratoghosopi diṭṭhiṭṭhānaṃ imāni aṭṭha diṭṭhiṭṭhānāni.