[342] Taṃ jīvaṃ taṃ sarīranti antaggāhikāya diṭṭhiyā katamehi pañcahākārehi abhiniveso hoti . rūpaṃ jīvañceva sarīrañca yaṃ jīvaṃ taṃ sarīranti abhinivesaparāmāso diṭṭhi tāya diṭṭhiyā so anto gahitoti antaggāhikā diṭṭhi diṭṭhi na vatthu vatthu na diṭṭhi aññā diṭṭhi aññaṃ vatthu yā ca diṭṭhi yañca vatthu ayaṃ Paṭhamā taṃ jīvaṃ taṃ sarīranti antaggāhikā diṭṭhi antaggāhikā diṭṭhi micchādiṭṭhi .pe. imāni saññojanāni na ca diṭṭhiyo vedanā jīvā ceva sarīrañca saññā jīvā ceva sarīrañca saṅkhārā jīvā ceva sarīrañca viññāṇaṃ jīvañceva sarīrañca yaṃ jīvaṃ taṃ sarīranti abhinivesaparāmāso diṭṭhi tāya diṭṭhiyā so anto gahitoti antaggāhikā diṭṭhi .pe. taṃ jīvaṃ taṃ sarīranti antaggāhikāya diṭṭhiyā imehi pañcahākārehi abhiniveso hoti.
[343] Aññaṃ jīvaṃ aññaṃ sarīranti antaggāhikāya diṭṭhiyā katamehi pañcahākārehi abhiniveso hoti . rūpaṃ sarīraṃ na jīvaṃ taṃ sarīraṃ aññaṃ jīvaṃ aññaṃ sarīranti abhinivesaparāmāso diṭṭhi tāya diṭṭhiyā so anto gahitoti antaggāhikā diṭṭhi diṭṭhi na vatthu vatthu na diṭṭhi aññā diṭṭhi aññaṃ vatthu yā ca diṭṭhi yañca vatthu ayaṃ paṭhamā aññaṃ jīvaṃ aññaṃ sarīranti antaggāhikā diṭṭhi antaggāhikā diṭṭhi micchādiṭṭhi .pe. imāni saññojanāni na ca diṭṭhiyo vedanā sarīraṃ na jīvaṃ saññā sarīraṃ na jīvaṃ saṅkhārā sarīraṃ na jīvaṃ viññāṇaṃ sarīraṃ na jīvaṃ taṃ sarīraṃ aññaṃ jīvaṃ aññaṃ sarīranti abhinivesaparāmāso diṭṭhi tāya diṭṭhiyā so anto gahitoti antaggāhikā diṭṭhi .pe. aññaṃ jīvaṃ aññaṃ sarīranti antaggāhikāya diṭṭhiyā imehi pañcahākārehi abhiniveso hoti.
[344] Hoti tathāgato parammaraṇāti antaggāhikāya diṭṭhiyā katamehi pañcahākārehi abhiniveso hoti . rūpaṃ idheva maraṇadhammaṃ tathāgato kāyassa bhedā hotipi tiṭṭhatipi uppajjatipi nibbattatipīti abhinivesaparāmāso diṭṭhi tāya diṭṭhiyā so anto gahitoti antaggāhikā diṭṭhi diṭṭhi na vatthu vatthu na diṭṭhi aññā diṭṭhi aññaṃ vatthu yā ca diṭṭhi yañca vatthu ayaṃ paṭhamā hoti tathāgato parammaraṇāti antaggāhikā diṭṭhi antaggāhikā diṭṭhi micchādiṭṭhi .pe. imāni saññojanāni na ca diṭṭhiyo vedanā idheva maraṇadhammā saññā idheva maraṇadhammā saṅkhārā idheva maraṇadhammā viññāṇaṃ idheva maraṇadhammaṃ tathāgato kāyassa bhedā hotipi tiṭṭhatipi uppajjatipi nibbattatipīti abhinivesaparāmāso diṭṭhi tāya diṭṭhiyā so anto gahitoti antaggāhikā diṭṭhi .pe. hoti tathāgato parammaraṇāti antaggāhikāya diṭṭhiyā imehi pañcahākārehi abhiniveso hoti.