[348] Pubbantānudiṭṭhiyā katamehi aṭṭhārasahi ākārehi abhiniveso hoti . cattāro sassatavādā cattāro ekaccasassatikā cattāro antānantikā cattāro amarāvikkhepikā dve adhiccasamuppannikā pubbantānudiṭṭhiyā imehi aṭṭhārasahi ākārehi abhiniveso hoti.

[349] Aparantānudiṭṭhiyā katamehi catucattāḷīsāya ākārehi abhiniveso hoti . soḷasa saññivādā aṭṭha asaññivādā aṭṭha nevasaññināsaññivādā satta ucchedavādā pañca diṭṭhadhammanibbānavādā aparantānudiṭṭhiyā imehi catucattāḷīsāya ākārehi abhiniveso hoti.

[350] Saññojanikāya diṭṭhiyā katamehi aṭṭhārasahi ākārehi abhiniveso hoti . yā diṭṭhi diṭṭhigataṃ diṭṭhigahaṇaṃ .pe. Diṭṭhābhiniveso diṭṭhiparāmāso saññojanikāya diṭṭhiyā imehi aṭṭhārasahi ākārehi abhiniveso hoti.

[351] Ahanti mānavinibandhāya diṭṭhiyā katamehi aṭṭhārasahi ākārehi abhiniveso hoti . cakkhuṃ ahanti mānavinibandhā diṭṭhi diṭṭhi na vatthu vatthu na diṭṭhi aññā diṭṭhi aññaṃ vatthu Yā ca diṭṭhi yañca vatthu ayaṃ paṭhamā ahanti mānavinibandhā diṭṭhi mānavinibandhā diṭṭhi micchādiṭṭhi .pe. imāni saññojanāni na ca diṭṭhiyo sotaṃ ahanti .pe. ghānaṃ ahanti jivhā ahanti kāyo ahanti mano ahanti .pe. dhammā ahanti cakkhuviññāṇaṃ ahanti .pe. manoviññāṇaṃ ahanti abhinivesaparāmāso ahanti mānavinibandhā diṭṭhi diṭṭhi na vatthu vatthu na diṭṭhi aññā diṭṭhi aññaṃ vatthu yā ca diṭṭhi yañca vatthu ayaṃ aṭṭhamī ahanti mānavinibandhā diṭṭhi mānavinibandhā diṭṭhi micchādiṭṭhi .pe. imāni saññojanāni na ca diṭṭhiyo ahanti mānavinibandhāya diṭṭhiyā imehi aṭṭhārasahi ākārehi abhiniveso hoti.