[352] Mamanti mānavinibandhāya diṭṭhiyā katamehi aṭṭhārasahi ākārehi abhiniveso hoti . cakkhuṃ mamanti mānavinibandhā diṭṭhi diṭṭhi na vatthu vatthu na diṭṭhi aññā diṭṭhi aññaṃ vatthu yā ca diṭṭhi yañca vatthu ayaṃ paṭhamā mamanti mānavinibandhā diṭṭhi mānavinibandhā diṭṭhi micchādiṭṭhi .pe. imāni saññojanāni na ca diṭṭhiyo sotaṃ mamanti .pe. ghānaṃ mamanti jivhā mamanti .pe. Mano mamanti .pe. dhammā mamanti cakkhuviññāṇaṃ mamanti .pe. manoviññāṇaṃ mamanti abhinivesaparāmāso mamanti mānavinibandhā diṭṭhi diṭṭhi na vatthu vatthu Na diṭṭhi aññā diṭṭhi aññaṃ vatthu yā ca diṭṭhi yañca vatthu ayaṃ aṭṭhamī mamanti mānavinibandhā diṭṭhi mānavinibandhā diṭṭhi micchādiṭṭhi .pe. imāni saññojanāni na ca diṭṭhiyo mamanti mānavinibandhāya diṭṭhiyā imehi aṭṭhārasahi ākārehi abhiniveso hoti.

[353] Attavādapaṭisaṃyuttāya diṭṭhiyā katamehi vīsatiyā ākārehi abhiniveso hoti . idha assutavā puthujjano ariyānaṃ adassāvī ariyadhammassa akovido ariyadhamme avinīto sappurisānaṃ adassāvī sappurisadhammassa akovido sappurisadhamme avinīto rūpaṃ attato samanupassati rūpavantaṃ vā attānaṃ attani vā rūpaṃ rūpasmiṃ vā attānaṃ .pe. vedanaṃ saññaṃ saṅkhāre viññāṇaṃ attato samanupassati viññāṇavantaṃ vā attānaṃ attani vā viññāṇaṃ viññāṇasmiṃ vā attānaṃ .pe.. {353.1} Kathaṃ rūpaṃ attato samanupassati . Idhekacco paṭhavīkasiṇaṃ .pe. odātakasiṇaṃ attato samanupassati yaṃ odātakasiṇaṃ so ahaṃ yo ahaṃ taṃ odātakasiṇanti odātakasiṇañca attañca advayaṃ samanupassati seyyathāpi telappadīpassa jhāyato yā acchi so vaṇṇo yo vaṇṇo sā acchīti acchiñca vaṇṇañca advayaṃ samanupassati evameva idhekacco odātakasiṇaṃ attato samanupassati .pe. ayaṃ paṭhamā rūpavatthukā attavādapaṭisaṃyuttā diṭṭhi Attavādapaṭisaṃyuttā diṭṭhi micchādiṭṭhi .pe. imāni saññojanāni na ca diṭṭhiyo attavādapaṭisaṃyuttāya diṭṭhiyā imehi vīsatiyā ākārehi abhiniveso hoti.