[356] Dvīhi bhikkhave diṭṭhigatehi pariyuṭṭhitā devamanussā oliyanti eke atidhāvanti eke cakkhumanto ca passanti. {356.1} Kathañca bhikkhave oliyanti eke bhavārāmā bhikkhave devamanussā bhavaratā bhavasammuditā tesaṃ bhavanirodhāya dhamme desiyamāne cittaṃ na pakkhandati na sampasīdati na santiṭṭhati nādhimuccati evaṃ kho bhikkhave oliyanti eke. {356.2} Kathañca bhikkhave atidhāvanti eke bhavena kho paneke aṭṭiyamānā harāyamānā jigucchamānā vibhavaṃ abhinandanti yato kira bho attā kāyassa bhedā ucchijjati vinassati na hoti parammaraṇāti etaṃ santaṃ etaṃ paṇītaṃ yathābhavanti evaṃ kho bhikkhave atidhāvanti eke. {356.3} Kathañca bhikkhave cakkhumanto ca passanti idha bhikkhave bhikkhu bhūtaṃ bhūtato passati bhūtaṃ bhūtato disvā bhūtassa nibbidāya virāgāya nirodhāya paṭipanno hoti evaṃ kho bhikkhave cakkhumanto Ca passanti. Yo bhūtaṃ bhūtato disvā bhūtassa ca atikkamaṃ yathābhūtedhimuccati bhavataṇhāparikkhayā sace bhūtassa pariññāto so vītataṇho bhavābhave bhūtassa vibhavā bhikkhu nāgacchati punabbhavanti.

[357] Tayo puggalā vipannadiṭṭhī tayo puggalā sampannadiṭṭhiṃ. {357.1} Katame tayo puggalā vipannadiṭṭhī titthiyo ca titthiyasāvako ca yo ca micchādiṭṭhiko ime tayo puggalā vipannadiṭṭhī. {357.2} Katame tayo puggalā sampannadiṭṭhī tathāgato ca tathāgatassa sāvako ca yo ca sammādiṭṭhiko ime tayo puggalā sampannadiṭṭhī. Kodhano upanāhī ca pāpamakkhī ca yo naro vipannadiṭṭhi māyāvī taṃ jaññā vasalo iti. Akkodhano anupanāhī amakkhī suddhataṃ gato sampannadiṭṭhi medhāvī taṃ jaññā ariyo itīti.

[358] Tisso vipannadiṭṭhiyo tisso sampannadiṭṭhiyo. {358.1} Katamā tisso vipannadiṭṭhiyo . Etaṃ mamanti vipannadiṭṭhi esohamasmīti vipannadiṭṭhi eso me attāti vipannadiṭṭhi imā Tisso vipannadiṭṭhiyo. {358.2} Katamā tisso sampannadiṭṭhiyo . netaṃ mamanti sampannadiṭṭhi nesohamasmīti sampannadiṭṭhi na meso attāti sampannadiṭṭhi imā tisso sampannadiṭṭhiyo.