[366] Katame aṭṭhārasa upakkilesā uppajjanti . Assāsādimajjhapariyosānaṃ satiyā anugacchato ajjhattavikkhepagataṃ cittaṃ samādhissa paripantho passāsādimajjhapariyosānaṃ satiyā anugacchato bahiddhāvikkhepagataṃ cittaṃ samādhissa paripantho assāsapaṭikaṅkhaṇā nikanti taṇhācariyā samādhissa paripantho passāsapaṭikaṅkhaṇā nikanti taṇhācariyā samādhissa paripantho assāsenābhitunnassa passāsapaṭilābhe mucchanā samādhissa paripantho passāsenābhitunnassa assāsapaṭilābhe mucchanā samādhissa paripantho. Anugacchanā ca assāsaṃ passāsaṃ anugacchanā sati ajjhattavikkhepā kaṅkhaṇā bahiddhāvikkhepapanthanā cha [4]- ete upakkilesā ānāpānassatisamādhissa yehi vikampamānassa no ce cittaṃ vimuccati vimokkhaṃ appajānantā te honti parapattiyāti.

[367] Nimittaṃ āvajjato assāse cittaṃ vikampati samādhissa paripantho assāsaṃ āvajjato nimitte cittaṃ vikampati samādhissa paripantho nimittaṃ āvajjato passāse cittaṃ vikampati samādhissa paripantho passāsaṃ āvajjato nimitte cittaṃ vikampati samādhissa paripantho assāsaṃ āvajjato passāse cittaṃ vikampati samādhissa paripantho passāsaṃ āvajjato assāse Cittaṃ vikampati samādhissa paripantho. Nimittaṃ āvajjamānassa assāse vikkhippate mano assāsaṃ āvajjamānassa nimitte cittaṃ vikampati nimittaṃ āvajjamānassa passāse vikkhippate mano passāsaṃ āvajjamānassa nimitte cittaṃ vikampati assāsaṃ āvajjamānassa passāse vikkhippate mano passāsaṃ āvajjamānassa assāse cittaṃ vikampati cha ete upakkilesā ānāpānassatisamādhissa yehi vikampamānassa no ce cittaṃ vimuccati vimokkhaṃ appajānantā te honti parapattiyāti. {367.1} Atītānudhāvanaṃ cittaṃ vikkhepānupatitaṃ samādhissa paripantho anāgatapaṭikaṅkhaṇaṃ cittaṃ vikampitaṃ samādhissa paripantho līnaṃ cittaṃ kosajjānupatitaṃ samādhissa paripantho atipaggahitaṃ cittaṃ uddhaccānupatitaṃ samādhissa paripantho abhiññātaṃ cittaṃ rāgānupatitaṃ samādhissa paripantho apaññātaṃ cittaṃ byāpādānupatitaṃ samādhissa paripantho.