[370] Katamāni terasa vodāne ñāṇāni . atītānudhāvanaṃ cittaṃ vikkhepānupatitaṃ taṃ vivajjayitvā ekaṭṭhāne samādahati evaṃpi cittaṃ na vikkhepaṃ gacchati anāgatapaṭikaṅkhaṇaṃ cittaṃ vikampitaṃ taṃ vivajjayitvā tattheva adhimokkheti evaṃpi cittaṃ na vikkhepaṃ gacchati līnaṃ cittaṃ kosajjānupatitaṃ taṃ paggaṇhitvā kosajjaṃ pajahati evaṃpi cittaṃ na vikkhepaṃ gacchati atipaggahitaṃ cittaṃ uddhaccānupatitaṃ taṃ niggaṇhitvā uddhaccaṃ pajahati evaṃpi cittaṃ na vikkhepaṃ gacchati abhiññātaṃ cittaṃ rāgānupatitaṃ taṃ sampajāno hutvā rāgaṃ pajahati evaṃpi cittaṃ na vikkhepaṃ gacchati apaññātaṃ cittaṃ byāpādānupatitaṃ taṃ sampajāno hutvā byāpādaṃ pajahati evaṃpi cittaṃ na vikkhepaṃ gacchati imehi chahi ṭhānehi parisuddhaṃ cittaṃ pariyodātaṃ ekattagataṃ hoti.

[371] Katame te ekattā . dānavossaggupaṭṭhānekattaṃ samathanimittupaṭṭhānekattaṃ vayalakkhaṇupaṭṭhānekattaṃ nirodhupaṭṭhānekattaṃ dānavossaggupaṭṭhānekattaṃ cāgādhimuttānaṃ samathanimittupaṭṭhānekattañca Adhicittamanuyuttānaṃ vayalakkhaṇupaṭṭhānekattañca vipassakānaṃ nirodhupaṭṭhānekattañca ariyapuggalānaṃ imehi catūhi ṭhānehi ekattagataṃ cittaṃ paṭipadāvisuddhipasannañceva hoti upekkhānubrūhitañca ñāṇena ca sampahaṃsitaṃ.

[372] Paṭhamajjhānassa ko ādi kiṃ majjhe kiṃ pariyosānaṃ . Paṭhamajjhānassa paṭipadāvisuddhi ādi upekkhānubrūhanā majjhe sampahaṃsanā pariyosānaṃ.

[373] Paṭhamajjhānassa paṭipadāvisuddhi ādi ādissa kati lakkhaṇāni . ādissa tīṇi lakkhaṇāni yo tassa paripantho tato cittaṃ visujjhati visuddhattā cittaṃ majjhimaṃ samathanimittaṃ paṭipajjati paṭipannattā tattha cittaṃ pakkhandati yañca paripanthato cittaṃ visujjhati yañca visuddhattā cittaṃ majjhimaṃ samathanimittaṃ paṭipajjati yañca paṭipannattā tattha cittaṃ pakkhandati paṭhamajjhānassa paṭipadāvisuddhi ādi ādissa imāni tīṇi lakkhaṇāni tena vuccati paṭhamajjhānaṃ ādikalyāṇañceva hoti lakkhaṇasampannañca.