[374] Paṭhamajjhānassa upekkhānubrūhanā majjhe majjhassa kati lakkhaṇāni . majjhassa tīṇi lakkhaṇāni visuddhaṃ cittaṃ ajjhupekkhati samathapaṭipannaṃ ajjhupekkhati ekattupaṭṭhānaṃ ajjhupekkhati yañca visuddhaṃ cittaṃ ajjhupekkhati yañca Samathapaṭipannaṃ ajjhupekkhati yañca ekattupaṭṭhānaṃ ajjhupekkhati paṭhamajjhānassa upekkhānubrūhanā majjhe majjhassa imāni tīṇi lakkhaṇāni tena vuccati paṭhamajjhānaṃ majjhe kalyāṇañceva hoti lakkhaṇasampannañca.

[375] Paṭhamajjhānassa sampahaṃsanā pariyosānaṃ pariyosānassa kati lakkhaṇāni . pariyosānassa cattāri lakkhaṇāni tattha jātānaṃ dhammānaṃ anativattanaṭṭhena sampahaṃsanā indriyānaṃ ekarasaṭṭhena sampahaṃsanā tadupagaviriyavāhanaṭṭhena sampahaṃsanā āsevanaṭṭhena sampahaṃsanā paṭhamajjhānassa sampahaṃsanā pariyosānaṃ pariyosānassa imāni cattāri lakkhaṇāni tena vuccati paṭhamajjhānaṃ pariyosānakalyāṇañceva hoti lakkhaṇasampannañca evaṃ tivattagataṃ cittaṃ tividhakalyāṇakaṃ dasalakkhaṇasampannaṃ vitakkasampannañceva hoti vicārasampannañca pītisampannañca sukhasampannañca cittassa adhiṭṭhānasampannañca saddhāsampannañca viriyasampannañca satisampannañca samādhisampannañca paññāsampannañca.

[376] Dutiyajjhānassa ko ādi kiṃ majjhe kiṃ pariyosānaṃ . Dutiyajjhānassa paṭipadāvisuddhi ādi upekkhānubrūhanā majjhe sampahaṃsanā pariyosānaṃ .pe. evaṃ tivattagataṃ cittaṃ tividhakalyāṇakaṃ dasalakkhaṇasampannaṃ vicārasampannañca pītisampannañceva hoti sukhasampannañca cittassa adhiṭṭhānasampannañca Saddhāsampannañca viriyasampannañca satisampannañca samādhisampannañca paññāsampannañca.

[377] Tatiyajjhānassa ko ādi kiṃ majjhe kiṃ pariyosānaṃ .pe. evaṃ tivattagataṃ cittaṃ tividhakalyāṇakaṃ dasalakkhaṇasampannaṃ pītisampannañca sukhasampannañceva hoti cittassa adhiṭṭhānasampannañca saddhāsampannañca viriyasampannañca satisampannañca samādhisampannañca paññāsampannañca.