[387] Katamāni battiṃsaṃ satokārīsu ñāṇāni idha bhikkhu araññagato vā rukkhamūlagato vā suññāgāragato vā nisīdati pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā so satova assasati .pe. sabbakāyapaṭisaṃvedī assasissāmīti sikkhati sabbakāyapaṭisaṃvedī passasissāmīti sikkhati passambhayaṃ kāyasaṅkhāraṃ assasissāmīti sikkhati passambhayaṃ kāyasaṅkhāraṃ passasissāmīti sikkhati pītipaṭisaṃvedī sukhapaṭisaṃvedī cittasaṅkhārapaṭisaṃvedī passambhayaṃ cittasaṅkhāraṃ cittapaṭisaṃvedī abhippamodayaṃ cittaṃ samādahaṃ cittaṃ vimocayaṃ cittaṃ aniccānupassī virāgānupassī nirodhānupassī paṭinissaggānupassī assasissāmīti sikkhati paṭinissaggānupassī passasissāmīti sikkhati.

[388] Idhāti imissā diṭṭhiyā imissā khantiyā imissā ruciyā imasmiṃ ādāye imasmiṃ dhamme imasmiṃ vinaye imasmiṃ dhammavinaye imasmiṃ pāvacane imasmiṃ brahmacariye imasmiṃ satthusāsane tena vuccati idhāti.

[389] Satova assasatīti [3]- battiṃsāya ākārehi satokārī dīghaṃ assāsavasena cittassekaggataṃ avikkhepaṃ pajānato satiṃ upaṭṭhitā hoti tāya satiyā tena ñāṇena satokārī hoti dīghaṃ passāsavasena cittassa ekaggataṃ avikkhepaṃ pajānato satiṃ upaṭṭhitā Ṭhitā hoti tāya satiyā tena ñāṇena satokārī hoti rassaṃ assāsavasena cittassa ekaggataṃ avikkhepaṃ pajānato satiṃ upaṭṭhitā hoti tāya satiyā tena ñāṇena satokārī hoti rassaṃ passāsavasena cittassa ekaggataṃ avikkhepaṃ pajānato satiṃ upaṭṭhitā hoti tāya satiyā tena ñāṇena satokārī hoti .pe. Paṭinissaggānupassī assāsavasena paṭinissaggānupassī passāsavasena cittassa ekaggataṃ avikkhepaṃ pajānato satiṃ upaṭṭhitā hoti tāya satiyā tena ñāṇena satokārī hoti.