[448] Catūsu ariyasaccesu paññindriyassa vasena katamehi vīsatiyā ākārehi pañcannaṃ indriyānaṃ cariyā daṭṭhabbā . dukkhe ariyasacce dassanādhipateyyaṭṭhena paññindriyassa cariyā daṭṭhabbā paññindriyassa vasena adhimokkhaṭṭhena saddhindriyassa cariyā daṭṭhabbā paggahaṭṭhena viriyindriyassa cariyā daṭṭhabbā upaṭṭhānaṭṭhena satindriyassa cariyā daṭṭhabbā avikkhepaṭṭhena samādhindriyassa cariyā daṭṭhabbā dukkhasamudaye ariyasacce .pe. Dukkhanirodhe ariyasacce dukkhanirodhāgāminiyā paṭipadāya ariyasacce dassanādhipateyyaṭṭhena paññindriyassa cariyā daṭṭhabbā paññindriyassa vasena adhimokkhaṭṭhena saddhindriyassa cariyā daṭṭhabbā paggahaṭṭhena viriyindriyassa cariyā daṭṭhabbā upaṭṭhānaṭṭhena satindriyassa cariyā daṭṭhabbā avikkhepaṭṭhena samādhindriyassa cariyā daṭṭhabbā catūsu ariyasaccesu paññindriyassa vasena imehi vīsatiyā ākārehi pañcannaṃ indriyānaṃ cariyā daṭṭhabbā.

[449] Cāro ca vihāro ca anubuddho hoti paṭividdho yathā carantaṃ yathā viharantaṃ viññū sabrahmacārī gambhīresu ṭhānesu Okappeyyuṃ addhā ayamāyasmā patto vā pāpuṇissati vā. {449.1} Cariyāti aṭṭha cariyāyo iriyāpathacariyā āyatanacariyā saticariyā samādhicariyā ñāṇacariyā maggacariyā patticariyā lokatthacariyā. {449.2} Iriyāpathacariyāti catūsu iriyāpathesu. Āyatanacariyāti chasu ajjhattikabāhiresu āyatanesu . saticariyāti catūsu satipaṭṭhānesu . Samādhicariyāti catūsu jhānesu . ñāṇacariyāti catūsu ariyasaccesu . Maggacariyāti catūsu ariyamaggesu . patticariyāti catūsu sāmaññaphalesu . Lokatthacariyāti tathāgatesu arahantesu sammāsambuddhesu padeso paccekabuddhesu padeso sāvakesu . iriyāpathacariyā ca paṇidhisampannānaṃ āyatanacariyā ca indriyesu guttadvārānaṃ saticariyā ca appamādavihārīnaṃ samādhicariyā ca adhicittamanuyuttānaṃ ñāṇacariyā ca buddhisampannānaṃ maggacariyā ca sammāpaṭipannānaṃ patticariyā ca adhigataphalānaṃ lokatthacariyā ca tathāgatānaṃ arahantānaṃ sammāsambuddhānaṃ padeso paccekabuddhānaṃ padeso sāvakānaṃ imā aṭṭha cariyāyo. {449.3} Aparāpi aṭṭha cariyāyo adhimuccanto saddhāya carati paggaṇhanto viriyena carati upaṭṭhāpento satiyā carati avikkhepaṃ Karonto samādhinā carati pajānanto paññāya carati vijānanto viññāṇena carati evaṃ paṭipanno visesamadhigacchatīti visesacariyāya carati evaṃ paṭipannassa kusalā dhammā āyāpentīti āyatanacariyāya carati imā aṭṭha cariyāyo. {449.4} Aparāpi aṭṭha cariyāyo dassanacariyā ca sammādiṭṭhiyā abhiropanacariyā ca sammāsaṅkappassa pariggahacariyā ca sammāvācāya samuṭṭhānacariyā ca sammākammantassa vodānacariyā ca sammāājīvassa paggahacariyā ca sammāvāyāmassa upaṭṭhānacariyā ca sammāsatiyā avikkhepacariyā ca sammāsamādhissa imā aṭṭha cariyāyo.