[459] Puthujjano samādhiṃ bhāvento katihākārehi upaṭṭhānakusalo hoti sekkho samādhiṃ bhāvento katihākārehi upaṭṭhānakusalo hoti vītarāgo samādhiṃ bhāvento katihākārehi upaṭṭhānakusalo hoti . puthujjano samādhiṃ bhāvento sattahi ākārehi upaṭṭhānakusalo hoti sekkho samādhiṃ bhāvento aṭṭhahi ākārehi upaṭṭhānakusalo hoti vītarāgo samādhiṃ bhāvento dasahi ākārehi upaṭṭhānakusalo hoti.

[460] Puthujjano samādhiṃ bhāvento katamehi sattahākārehi upaṭṭhānakusalo hoti . āvajjitattā ārammaṇupaṭṭhānakusalo hoti samathanimittupaṭṭhānakusalo hoti paggahanimittupaṭṭhānakusalo hoti avikkhepupaṭṭhānakusalo hoti obhāsupaṭṭhānakusalo hoti sampahaṃsanupaṭṭhānakusalo hoti upekkhupaṭṭhānakusalo hoti puthujjano samādhiṃ bhāvento imehi sattahākārehi upaṭṭhānakusalo hoti. {460.1} Sekkho samādhiṃ bhāvento katamehi aṭṭhahākārehi upaṭṭhānakusalo hoti . āvajjitattā ārammaṇupaṭṭhānakusalo hoti samathanimittupaṭṭhānakusalo hoti paggahanimittupaṭṭhānakusalo hoti avikkhepupaṭṭhānakusalo hoti obhāsupaṭṭhānakusalo hoti Sampahaṃsanupaṭṭhānakusalo hoti upekkhupaṭṭhānakusalo hoti ekattupaṭṭhānakusalo hoti sekkho samādhiṃ bhāvento imehi aṭṭhahākārehi upaṭṭhānakusalo hoti. {460.2} Vītarāgo samādhiṃ bhāvento katamehi dasahākārahi upaṭṭhānakusalo hoti . āvajjitattā ārammaṇupaṭṭhānakusalo hoti .pe. ekattupaṭṭhānakusalo hoti ñāṇupaṭṭhānakusalo hoti cittupaṭṭhānakusalo hoti vītarāgo samādhiṃ bhāvento imehi dasahākārehi upaṭṭhānakusalo hoti.

[461] Puthujjano vipassanaṃ bhāvento katihākārehi upaṭṭhānakusalo hoti katihākārehi anupaṭṭhānakusalo hoti sekkho vipassanaṃ bhāvento katihākārehi upaṭṭhānakusalo hoti katihākārehi anupaṭṭhānakusalo hoti vītarāgo vipassanaṃ bhāvento katihākārehi upaṭṭhānakusalo hoti katihākārehi anupaṭṭhānakusalo hoti . puthujjano vipassanaṃ bhāvento navahākārehi upaṭṭhānakusalo hoti navahākārehi anupaṭṭhānakusalo hoti sekkho vipassanaṃ bhāvento dasahākārehi upaṭṭhānakusalo hoti dasahākārehi anupaṭṭhānakusalo hoti vītarāgo vipassanaṃ bhāvento dvādasahākārehi upaṭṭhānakusalo hoti dvādasahākārehi anupaṭṭhānakusalo hoti.