[462] Puthujjano vipassanaṃ bhāvento katamehi navahākārehi Upaṭṭhānakusalo hoti katamehi navahākārehi anupaṭṭhānakusalo hoti . aniccato upaṭṭhānakusalo hoti niccato anupaṭṭhānakusalo hoti dukkhato upaṭṭhānakusalo hoti sukhato anupaṭṭhānakusalo hoti anattato upaṭṭhānakusalo hoti attato anupaṭṭhānakusalo hoti khayato upaṭṭhānakusalo hoti ghanato anupaṭṭhānakusalo hoti vayato upaṭṭhānakusalo hoti āyuhanānupaṭṭhānakusalo hoti vipariṇāmupaṭṭhānakusalo hoti dhuvato anupaṭṭhānakusalo hoti animittupaṭṭhānakusalo hoti nimittānupaṭṭhānakusalo hoti appaṇihitupaṭṭhānakusalo hoti paṇidhānupaṭṭhānakusalo hoti suññatupaṭṭhānakusalo hoti abhinivesānupaṭṭhānakusalo hoti puthujjano vipassanaṃ bhāvento imehi navahākārehi upaṭṭhānakusalo hoti imehi navahākārehi anupaṭṭhānakusalo hoti. {462.1} Sekkho vipassanaṃ bhāvento katamehi dasahākārehi upaṭṭhānakusalo hoti katamehi dasahākārehi anupaṭṭhānakusalo hoti . Sekkho vipassanaṃ bhāvento aniccato upaṭṭhānakusalo hoti niccato anupaṭṭhānakusalo hoti .pe. suññatupaṭṭhānakusalo hoti abhinivesānupaṭṭhānakusalo hoti ñāṇupaṭṭhānakusalo hoti aññāṇānupaṭṭhānakusalo hoti sekkho vipassanaṃ bhāvento imehi dasahākārehi upaṭṭhānakusalo hoti imehi dasahākārehi anupaṭṭhānakusalo Hoti. {462.2} Vītarāgo vipassanaṃ bhāvento katamehi dvādasahākārehi upaṭṭhānakusalo hoti katamehi dvādasahākārehi anupaṭṭhānakusalo hoti . aniccato upaṭṭhānakusalo hoti niccato anupaṭṭhānakusalo hoti .pe. ñāṇupaṭṭhānakusalo hoti aññāṇānupaṭṭhānakusalo hoti visaññogupaṭṭhānakusalo hoti saññogānupaṭṭhānakusalo hoti nirodhupaṭṭhānakusalo hoti saṅkhārānupaṭṭhānakusalo hoti vītarāgo vipassanaṃ bhāvento imehi dvādasahākārehi upaṭṭhānakusalo hoti imehi dvādasahākārehi anupaṭṭhānakusalo hoti āvajjitattā ārammaṇupaṭṭhānakusalavasena indriyāni samodhāneti gocarañca pajānāti samatthañca paṭivijjhati .pe. Dhamme samodhāneti gocarañca pajānāti samatthañca paṭivijjhati.