[483] Katamo jhānavimokkho . nekkhammaṃ jāyatīti jhānaṃ Kāmacchandaṃ jhāpetīti jhānaṃ jāyanto muccatīti jhānavimokkho jhāpento muccatīti jhānavimokkho jāyantīti dhammā jhāpetīti kilese jāte ca jhāpe ca jānātīti jhānavimokkho abyāpādo jāyatīti jhānaṃ byāpādaṃ jhāpetīti jhānaṃ jāyanto muccatīti jhānavimokkho jhāpento muccatīti jhānavimokkho jāyantīti dhammā jhāpetīti kilese jāte ca jhāpe ca jānātīti jhānavimokkho ālokasaññā jāyatīti jhānaṃ thīnamiddhaṃ jhāpetīti jhānaṃ avikkhepo jāyatīti jhānaṃ uddhaccaṃ jhāpetīti jhānaṃ dhammavavatthānaṃ jāyatīti jhānaṃ vicikicchaṃ jhāpetīti jhānaṃ ñāṇaṃ jāyatīti jhānaṃ avijjaṃ jhāpetīti jhānaṃ pāmujjaṃ jāyatīti jhānaṃ aratiṃ jhāpetīti jhānaṃ paṭhamajjhānaṃ jāyatīti jhānaṃ nīvaraṇaṃ jhāpetīti jhānaṃ .pe. Arahattamaggo jāyatīti jhānaṃ sabbakilese jhāpetīti jhānaṃ jāyanto muccatīti jhānavimokkho jhāpento muccatīti jhānavimokkho jāyantīti dhammā jhāpetīti kilese jāte ca jhāpe ca jānātīti jhānavimokkho ayaṃ jhānavimokkho.

[484] Katamo anupādācittassa vimokkho . siyā eko anupādācittassa vimokkho dasa anupādācittassa vimokkhā honti dasa anupādācittassa vimokkhā eko anupādācittassa vimokkho hoti vatthuvasena pariyāyena.