[539] Kathaṃ pahānaṭṭhena samathavipassanaṃ yuganaddhaṃ bhāveti . Uddhaccasahagatakilese ca khandhe ca pajahato cittassa ekaggatā avikkhepo samādhi nirodhagocaro avijjāsahagatakilese ca khandhe ca pajahato anupassanaṭṭhena vipassanā nirodhagocarā iti pahānaṭṭhena samathavipassanā ekarasā honti yuganaddhā honti aññamaññaṃ nātivattantīti tena vuccati pahānaṭṭhena samathavipassanaṃ yuganaddhaṃ bhāveti. {539.1} Kathaṃ pariccāgaṭṭhena samathavipassanaṃ yuganaddhaṃ bhāveti . Uddhaccasahagatakilese ca khandhe ca pariccajato cittassa ekaggatā avikkhepo samādhi nirodhagocaro avijjāsahagatakilese ca khandhe ca pariccajato anupassanaṭṭhena vipassanā nirodhagocarā iti pariccāgaṭṭhena samathavipassanā ekarasā honti yuganaddhā honti aññamaññaṃ nātivattantīti tena vuccati pariccāgaṭṭhena samathavipassanaṃ yuganaddhaṃ bhāveti. {539.2} Kathaṃ vuṭṭhānaṭṭhena samathavipassanaṃ yuganaddhaṃ bhāveti . Uddhaccasahagatakilesehi ca khandhehi ca vuṭṭhahato cittassa ekaggatā avikkhepo samādhi nirodhagocaro avijjāsahagatakilesehi ca khandhehi Ca vuṭṭhahato anupassanaṭṭhena vipassanā nirodhagocarā iti vuṭṭhānaṭṭhena samathavipassanā ekarasā honti yuganaddhā honti aññamaññaṃ nātivattantīti tena vuccati vuṭṭhānaṭṭhena samathavipassanaṃ yuganaddhaṃ bhāveti. {539.3} Kathaṃ vivaṭṭanaṭṭhena samathavipassanaṃ yuganaddhaṃ bhāveti . Uddhaccasahagatakilesehi ca khandhehi ca vivaṭṭato cittassa ekaggatā avikkhepo samādhi nirodhagocaro avijjāsahagatakilesehi ca khandhehi ca vivaṭṭato anupassanaṭṭhena vipassanā nirodhagocarā iti vivaṭṭanaṭṭhena samathavipassanā ekarasā honti yuganaddhā honti aññamaññaṃ nātivattantīti tena vuccati vivaṭṭanaṭṭhena samathavipassanaṃ yuganaddhaṃ bhāveti.

[540] Kathaṃ santaṭṭhena samathavipassanaṃ yuganaddhaṃ bhāveti . Uddhaccaṃ pajahato cittassa ekaggatā avikkhepo samādhi santo hoti nirodhagocaro avijjaṃ pajahato anupassanaṭṭhena vipassanā santā hoti nirodhagocarā iti santaṭṭhena samathavipassanā ekarasā honti yuganaddhā honti aññamaññaṃ nātivattantīti tena vuccati santaṭṭhena samathavipassanaṃ yuganaddhaṃ bhāveti. {540.1} Kathaṃ paṇītaṭṭhena samathavipassanaṃ yuganaddhaṃ bhāveti. Uddhaccaṃ pajahato cittassa ekaggatā avikkhepo samādhi paṇīto hoti nirodhagocaro avijjaṃ pajahato anupassanaṭṭhena vipassanā paṇītā hoti Nirodhagocarā iti paṇītaṭṭhena samathavipassanā ekarasā honti yuganaddhā honti aññamaññaṃ nātivattantīti tena vuccati paṇītaṭṭhena samathavipassanaṃ yuganaddhaṃ bhāveti. {540.2} Kathaṃ vimuttaṭṭhena samathavipassanaṃ yuganaddhaṃ bhāveti . Uddhaccaṃ pajahato cittassa ekaggatā avikkhepo samādhi vimutto hoti nirodhagocaro avijjaṃ pajahato anupassanaṭṭhena vipassanā vimuttā hoti nirodhagocarā iti rāgavirāgā cetovimutti avijjāvirāgā paññāvimutti iti vimuttaṭṭhena samathavipassanā ekarasā honti yuganaddhā honti aññamaññaṃ nātivattantīti tena vuccati vimuttaṭṭhena samathavipassanaṃ yuganaddhaṃ bhāveti.