[543] Rūpaṃ aniccato manasikaroto .pe. rūpaṃ dukkhato manasikaroto rūpaṃ anattato manasikaroto vedanaṃ saññaṃ saṅkhāre viññāṇaṃ cakkhuṃ .pe. jarāmaraṇaṃ aniccato manasikaroto jarāmaraṇaṃ dukkhato manasikaroto jarāmaraṇaṃ anattato manasikaroto obhāso uppajjati ñāṇaṃ uppajjati pīti uppajjati passaddhi uppajjati sukhaṃ uppajjati adhimokkho uppajjati paggāho uppajjati upaṭṭhānaṃ uppajjati upekkhā uppajjati nikkanti uppajjati nikkanti dhammoti nikkantiṃ āvajjati {543.1} tato vikkhepo uddhaccantena uddhaccena viggahitamānaso jarāmaraṇaṃ anattato upaṭṭhānaṃ yathābhūtaṃ nappajānāti jarāmaraṇaṃ aniccato upaṭṭhānaṃ yathābhūtaṃ nappajānāti jarāmaraṇaṃ dukkhato upaṭṭhānaṃ yathābhūtaṃ nappajānāti tena vuccati dhammuddhaccāviggahitamānasaṃ hoti so samayo yantaṃ cittaṃ ajjhattaññeva aniccato santiṭṭhati sannisīdati ekodi hoti samādhiyati tassa maggo sañjāyatīti kathaṃ maggo sañjāyati .pe. evaṃ maggo sañjāyati .pe. evaṃ saññojanāni pahīyanti anusayā byantīhonti evaṃ dhammuddhaccāviggahitamānasaṃ Hoti. Obhāse ceva ñāṇe ca pītiyā ca vikampati passaddhiyā sukhe ceva yehi cittaṃ pavedhati adhimokkhe ca paggāhe upaṭṭhāne ca vikampati upekkhāvajjanā ceva upekkhāya ca nikantiyā imāni dasa ṭhānāni paññāyassa pariccitā dhammuddhaccakusalo hoti na ca sammohagacchati vikampati ceva kilissati ca cavati cittabhāvanā vikampati kilissati bhāvanā parihāyati visujjhati na kilissati bhāvanā na parihāyati na ca vikkhippate cittaṃ na kilissati na cavati cittabhāvanā imehi catūhi ṭhānehi cittassa saṅkhepaṃ vikkhepaṃ [7]- Viggahitaṃ dasaṭṭhānehi sampajānātīti . Yuganaddhakathā. --------