[569] Tatra kho āyasmā sārīputto bhikkhū āmantesi āvusoti . āvusoti kho te bhikkhū āyasmato sārīputtassa paccassosuṃ . āyasmā sārīputto etadavoca sattime āvuso Bojjhaṅgā katame satta satisambojjhaṅgo dhammavicayasambojjhaṅgo .pe. upekkhāsambojjhaṅgo ime kho āvuso satta bojjhaṅgā imesaṃ svāhaṃ āvuso sattannaṃ bojjhaṅgānaṃ yena yena bojjhaṅgena ākaṅkhāmi pubbaṇhasamayaṃ viharituṃ tena tena bojjhaṅgena pubbaṇhasamayaṃ viharāmi yena yena bojjhaṅgena ākaṅkhāmi majjhantikasamayaṃ .pe. sāyaṇhasamayaṃ viharituṃ tena tena bojjhaṅgena sāyaṇhasamayaṃ viharāmi satisambojjhaṅgo iti ce me āvuso hoti appamāṇoti me hoti susamāraddhoti me hoti tiṭṭhantaṃ caraṃ tiṭṭhatīti pajānāmi sacepi me cavati idappaccayā me cavatīti pajānāmi dhammavicayasambojjhaṅgo .pe. {569.1} Upekkhāsambojjhaṅgo iti ce me āvuso hoti appamāṇoti me hoti susamāraddhoti me hoti tiṭṭhantaṃ caraṃ tiṭṭhatīti pajānāmi sacepi me cavati idappaccayā me cavatīti pajānāmi seyyathāpi āvuso rañño vā rājamahāmattassa vā nānārattānaṃ dussānaṃ dussakaraṇḍako pūro assa so yaññadeva dussayugaṃ ākaṅkheyya pubbaṇhasamaye pārupituṃ tantadeva dussayugaṃ pubbaṇhasamayaṃ pārupeyya yaññadeva dussayugaṃ ākaṅkheyya majjhantikasamayaṃ sāyaṇhasamayaṃ pārupituṃ tantadeva dussayugaṃ sāyaṇhasamayaṃ pārupeyya evameva kho ahaṃ āvuso imesaṃ sattannaṃ bojjhaṅgānaṃ yena yena bojjhaṅgena ākaṅkhāmi pubbaṇhasamayaṃ viharituṃ Tena tena bojjhaṅgena pubbaṇhasamayaṃ viharāmi yena yena bojjhaṅgena ākaṅkhāmi majjhantikasamayaṃ sāyaṇhasamayaṃ viharituṃ tena tena bojjhaṅgena sāyaṇhasamayaṃ viharāmi satisambojjhaṅgo iti ce me āvuso hoti appamāṇoti me hoti susamāraddhoti me hoti tiṭṭhantaṃ caraṃ tiṭṭhatīti pajānāmi sacepi me cavati idappaccayā me cavatīti pajānāmi .pe. upekkhāsambojjhaṅgo iti ce me āvuso hoti appamāṇoti me hoti susamāraddhoti me hoti tiṭṭhantaṃ caraṃ tiṭṭhatīti pajānāmi sacepi me cavati idappaccayā me cavatīti pajānāmi.