[621] Pañcimāni bhikkhave balāni katamāni pañca saddhābalaṃ viriyabalaṃ satibalaṃ samādhibalaṃ paññābalaṃ imāni kho bhikkhave pañca balāni. {621.1} Api ca aṭṭhasaṭṭhī balāni saddhābalaṃ viriyabalaṃ satibalaṃ samādhibalaṃ paññābalaṃ hiribalaṃ ottappabalaṃ paṭisaṅkhānabalaṃ bhāvanābalaṃ anavajjabalaṃ saṅgāhabalaṃ khantibalaṃ paññattibalaṃ nijjhattibalaṃ Issariyabalaṃ adhiṭṭhānabalaṃ samathabalaṃ vipassanābalaṃ dasa sekkhabalāni dasa asekkhabalāni dasa khīṇāsavabalāni dasa iddhibalāni dasa tathāgatabalāni.

[622] Katamaṃ saddhābalaṃ . assaddhiye na kampatīti saddhābalaṃ sahajātānaṃ dhammānaṃ upatthambhanaṭṭhena saddhābalaṃ kilesānaṃ pariyādānaṭṭhena saddhābalaṃ paṭivedhādivisodhanaṭṭhena saddhābalaṃ cittassa adhiṭṭhānaṭṭhena saddhābalaṃ cittassa vodānaṭṭhena saddhābalaṃ visesādhigamaṭṭhena saddhābalaṃ uttaripaṭivedhaṭṭhena saddhābalaṃ saccābhisamayaṭṭhena saddhābalaṃ nirodhe patiṭṭhāpakaṭṭhena saddhābalaṃ idaṃ saddhābalaṃ. {622.1} Katamaṃ viriyabalaṃ. Kosajje na kampatīti viriyabalaṃ sahajātānaṃ dhammānaṃ upatthambhanaṭṭhena viriyabalaṃ kilesānaṃ pariyādānaṭṭhena viriyabalaṃ paṭivedhādivisodhanaṭṭhena viriyabalaṃ cittassa adhiṭṭhānaṭṭhena viriyabalaṃ cittassa vodānaṭṭhena viriyabalaṃ visesādhigamaṭṭhena viriyabalaṃ uttaripaṭivedhaṭṭhena viriyabalaṃ saccābhisamayaṭṭhena viriyabalaṃ nirodhe patiṭṭhāpakaṭṭhena viriyabalaṃ idaṃ viriyabalaṃ. {622.2} Katamaṃ satibalaṃ . pamāde na kampatīti satibalaṃ sahajātānaṃ dhammānaṃ upatthambhanaṭṭhena satibalaṃ .pe. nirodhe patiṭṭhāpakaṭṭhena satibalaṃ idaṃ satibalaṃ.