[625] Katamaṃ khantibalaṃ . kāmacchandassa pahīnattā nekkhammaṃ khamatīti khantibalaṃ . byāpādassa pahīnattā abyāpādo khamatīti khantibalaṃ thīnamiddhassa pahīnattā ālokasaññā khamatīti khantibalaṃ uddhaccassa pahīnattā avikkhepo khamatīti khantibalaṃ vicikicchāya Pahīnattā dhammavavatthānaṃ khamatīti khantibalaṃ avijjāya pahīnattā ñāṇaṃ khamatīti khantibalaṃ aratiyā pahīnattā pāmujjaṃ khamatīti khantibalaṃ nīvaraṇānaṃ pahīnattā paṭhamajjhānaṃ khamatīti khantibalaṃ .pe. sabbakilesānaṃ pahīnattā arahattamaggo khamatīti khantibalaṃ idaṃ khantibalaṃ. {625.1} Katamaṃ paññattibalaṃ. Kāmacchandaṃ pajahanto nekkhammavasena cittaṃ paññapetīti paññattibalaṃ byāpādaṃ pajahanto abyāpādavasena cittaṃ paññapetīti paññattibalaṃ thīnamiddhaṃ pajahanto ālokasaññāvasena cittaṃ paññapetīti paññattibalaṃ .pe. sabbakilese pajahanto arahattamaggavasena cittaṃ paññapetīti paññattibalaṃ idaṃ paññattibalaṃ. {625.2} Katamaṃ nijjhattibalaṃ . Kāmacchandaṃ pajahanto nekkhammavasena cittaṃ nijjhāpetīti nijjhattibalaṃ byāpādaṃ pajahanto abyāpādavasena cittaṃ nijjhāpetīti nijjhattibalaṃ thīnamiddhaṃ pajahanto ālokasaññāvasena cittaṃ nijjhāpetīti nijjhattibalaṃ .pe. sabbakilese pajahanto arahattamaggavasena cittaṃ nijjhāpetīti nijjhattibalaṃ idaṃ nijjhattibalaṃ. {625.3} Katamaṃ issariyabalaṃ . Kāmacchandaṃ pajahanto nekkhammavasena cittaṃ vasaṃ vattetīti issariyabalaṃ byāpādaṃ pajahanto abyāpādavasena cittaṃ vasaṃ vattetīti issariyabalaṃ thīnamiddhaṃ pajahanto ālokasaññāvasena Cittaṃ vasaṃ vattetīti issariyabalaṃ .pe. sabbakilese pajahanto arahattamaggavasena cittaṃ vasaṃ vattetīti issariyabalaṃ idaṃ issariyabalaṃ. {625.4} Katamaṃ adhiṭṭhānabalaṃ. Kāmacchandaṃ pajahanto nekkhammavasena cittaṃ adhiṭṭhātīti adhiṭṭhānabalaṃ byāpādaṃ pajahanto abyāpādavasena cittaṃ adhiṭṭhātīti adhiṭṭhānabalaṃ thīnamiddhaṃ pajahanto ālokasaññāvasena cittaṃ adhiṭṭhātīti adhiṭṭhānabalaṃ .pe. sabbakilese pajahanto arahattamaggavasena cittaṃ adhiṭṭhātīti adhiṭṭhānabalaṃ idaṃ adhiṭṭhānabalaṃ.