[662] Cattārome bhikkhave dhammā bhāvitā bahulīkatā sotāpattiphalasacchikiriyāya saṃvattanti katame cattāro sappurisasaṃsevo saddhammassavanaṃ yonisomanasikāro dhammānudhammapaṭipatti ime kho bhikkhave cattāro dhammā bhāvitā bahulīkatā sotāpattiphalasacchikiriyāya saṃvattanti. {662.1} Cattārome bhikkhave dhammā bhāvitā bahulīkatā sakadāgāmiphalasacchikiriyāya saṃvattanti .pe.. {662.2} Anāgāmiphalasacchikiriyāya saṃvattanti .pe.. {662.3} Arahattaphalasacchikiriyāya saṃvattanti katame cattāro sappurisasaṃsevo saddhammassavanaṃ yonisomanasikāro dhammānudhammapaṭipatti ime kho bhikkhave cattāro dhammā bhāvitā bahulīkatā arahattaphalasacchikiriyāya saṃvattanti.
[663] Cattārome bhikkhave dhammā bhāvitā bahulīkatā Paññāpaṭilābhāya saṃvattanti paññābuḍḍhiyā saṃvattanti paññāvepullāya saṃvattanti mahāpaññatāya saṃvattanti puthupaññatāya saṃvattanti vipulapaññatāya saṃvattanti gambhīrapaññatāya saṃvattanti assāmantapaññatāya saṃvattanti bhūripaññatāya saṃvattanti paññābāhullāya saṃvattanti sīghapaññatāya saṃvattanti lahupaññatāya saṃvattanti hāsapaññatāya saṃvattanti javanapaññatāya saṃvattanti tikkhapaññatāya saṃvattanti nibbedhikapaññatāya saṃvattanti katame cattāro sappurisasaṃsevo saddhammassavanaṃ yonisomanasikāro dhammānudhammapaṭipatti ime kho bhikkhave cattāro dhammā bhāvitā bahulīkatā paññāpaṭilābhāya saṃvattanti paññābuḍḍhiyā saṃvattanti .pe. Nibbedhikapaññatāya saṃvattanti.
[664] Paññāpaṭilābhāya saṃvattantīti katamo paññāpaṭilābho . Catunnaṃ maggañāṇānaṃ catunnaṃ phalañāṇānaṃ catunnaṃ paṭisambhidāñāṇānaṃ channaṃ abhiññānaṃ tesattatīnaṃ ñāṇānaṃ sattasattatīnaṃ ñāṇānaṃ lābho paṭilābho patti sampatti phassanā sacchikiriyā upasampadā paññāpaṭilābhāya saṃvattantīti ayaṃ paññāpaṭilābho. {664.1} Paññābuḍḍhiyā saṃvattantīti katamā paññābuḍḍhi . Sattannañca sekkhānaṃ puthujjanakalyāṇakassa ca paññā vaḍḍhati arahato paññā vaḍḍhati vaḍḍhanā paññābuḍḍhiyā saṃvattantīti Ayaṃ paññābuḍḍhi. {664.2} Paññāvepullāya saṃvattantīti katamaṃ paññāvepullaṃ . Sattannañca sekkhānaṃ puthujjanakalyāṇakassa ca paññā vepullaṃ gacchati arahato paññā vepullatā paññāvepullāya saṃvattantīti idaṃ paññāvepullaṃ.