[686] Katamā vikubbanā iddhi . sikhissa bhagavato arahato sammāsambuddhassa abhibhū nāma sāvako brahmaloke ṭhito sahassīlokadhātuṃ sarena viññāpesi so dissamānenapi kāyena dhammaṃ desesi adissamānenapi kāyena dhammaṃ desesi dissamānenapi heṭṭhimena upaḍḍhakāyena adissamānenapi uparimena upaḍḍhakāyena dhammaṃ desesi dissamānenapi uparimena upaḍḍhakāyena adissamānenapi heṭṭhimena upaḍḍhakāyena dhammaṃ desesi so pakativaṇṇaṃ vijahitvā kumārakavaṇṇaṃ vā dasseti nāgavaṇṇaṃ vā dasseti supaṇṇavaṇṇaṃ vā dasseti yakkhavaṇṇaṃ vā dasseti asuravaṇṇaṃ vā dasseti indavaṇṇaṃ vā dasseti devavaṇṇaṃ vā Dasseti brahmavaṇṇaṃ vā dasseti samuddavaṇṇaṃ vā dasseti pabbatavaṇṇaṃ vā dasseti vanavaṇṇaṃ vā dasseti sīhavaṇṇaṃ vā dasseti byagghavaṇṇaṃ vā dasseti dīpivaṇṇaṃ vā dasseti hatthiṃpi dasseti assaṃpi dasseti rathaṃpi dasseti pattiṃpi dasseti vividhaṃpi senābyūhaṃ dasseti ayaṃ vikubbanā iddhi.

[687] Katamā manomayā iddhi . idha bhikkhu imamhā kāyā aññaṃ kāyaṃ abhinimmināti rūpiṃ manomayaṃ sabbaṅgapaccaṅgaṃ ahīnindriyaṃ seyyathāpi puriso muñjamhā isikaṃ pavāheyya tassa evamassa ayaṃ muñjo ayaṃ isikā añño muñjo aññā isikā muñjamhā tveva isikā pavāḷhāti seyyathāpi vā pana puriso asiṃ kosiyā pavāheyya tassa evamassa ayaṃ asi ayaṃ kosi añño asi aññā kosi kosiyā tveva asi pavāḷhoti seyyathāpi vā pana puriso ahiṃ karaṇḍā uddhareyya tassa evamassa ayaṃ ahi ayaṃ karaṇḍo añño ahi añño karaṇḍo karaṇḍā tveva ahi ubbhatoti evameva bhikkhu imamhā kāyā aññaṃ kāyaṃ abhinimmināti rūpaṃ manomayaṃ sabbaṅgapaccaṅgaṃ ahīnindriyaṃ ayaṃ manomayā iddhi.

[688] Katamā ñāṇavipphārā iddhi . aniccānupassanāya niccasaññāya pahānaṭṭho ijjhatīti ñāṇavipphārā iddhi dukkhānupassanāya sukhasaññāya anattānupassanāya attasaññāya nibbidānupassanāya Nandiyā virāgānupassanāya rāgassa nirodhānupassanāya samudayassa paṭinissaggānupassanāya ādānassa pahānaṭṭho ijjhatīti ñāṇavipphārā iddhi āyasmato bakkulassa ñāṇavipphārā iddhi āyasmato saṅkiccassa ñāṇavipphārā iddhi āyasmato bhūtapālassa ñāṇavipphārā iddhi ayaṃ ñāṇavipphārā iddhi.