[700] Hañci na atīte kilese pajahati na anāgate kilese pajahati na paccuppanne kilese pajahati tenahi natthi maggabhāvanā natthi phalasacchikiriyā natthi kilesappahānaṃ natthi dhammābhisamayo . Na hi atthi maggabhāvanā atthi phalasacchikiriyā atthi kilesappahānaṃ atthi dhammābhisamayo yathā kathaṃ viya yathāpi taruṇo rukkho ajātaphalo tamenaṃ puriso mūle chindeyya ye tassa rukkhassa ajātaphalā ajātāyeva na jāyanti anibbattāyeva na nibbattanti anuppannāyeva na uppajjanti apātubhūtāyeva {700.1} na pātubhavanti evameva uppādo hetu uppādo paccayo kilesānaṃ nibbattiyā uppāde ādīnavaṃ disvā anuppāde cittaṃ pakkhandati anuppāde cittassa pakkhandanattā ye uppādapaccayā kilesā nibbatteyyuṃ te ajātāyeva na jāyanti anibbattāyeva na nibbattanti anuppannāyeva na uppajjanti apātubhūtāyeva na pātubhavanti evaṃ hetunirodhā dukkhanirodho pavattahetu nimittahetu āyuhanahetu āyuhanā paccayo kilesānaṃ nibbattiyā āyuhane ādīnavaṃ disvā anāyuhane cittaṃ pakkhandati Anāyuhane cittassa pakkhandanattā ye āyuhanapaccayā kilesā nibbatteyyuṃ te ajātāyeva na jāyanti anibbattāyeva na nibbattanti anuppannāyeva na uppajjanti apātubhūtāyeva na pātubhavanti evaṃ hetunirodhā dukkhanirodho evaṃ atthi maggabhāvanā atthi phalasacchikiriyā atthi kilesappahānaṃ atthi dhammābhisamayoti. Abhisamayakathā niṭṭhitā. ----------