[225] Vasīti pañca vasiyo āvajjanāvasī samāpajjanāvasī adhiṭṭhānavasī vuṭṭhānavasī paccavekkhaṇāvasī . paṭhamajjhānaṃ yatthicchakaṃ yadicchakaṃ yāvaticchakaṃ āvajjati āvajjanāya dandhāyitattaṃ natthīti āvajjanāvasī paṭhamajjhānaṃ yatthicchakaṃ yadicchakaṃ yāvaticchakaṃ samāpajjati samāpajjanāya dandhāyitattaṃ natthīti samāpajjanāvasī paṭhamajjhānaṃ yatthicchakaṃ yadicchakaṃ yāvaticchakaṃ adhiṭṭhāti adhiṭṭhāne dandhāyitattaṃ natthīti adhiṭṭhānavasī paṭhamajjhānaṃ yatthicchakaṃ yadicchakaṃ yāvaticchakaṃ vuṭṭhāti vuṭṭhāne dandhāyitattaṃ natthīti vuṭṭhānavasī paṭhamajjhānaṃ yatthicchakaṃ yadicchakaṃ yāvaticchakaṃ paccavekkhati paccavekkhaṇāya dandhāyitattaṃ natthīti paccavekkhaṇāvasī dutiyajjhānaṃ .pe. Nevasaññānāsaññāyatanasamāpatti yatthicchakaṃ yadicchakaṃ yāvaticchakaṃ āvajjati āvajjanāya dandhāyitattaṃ natthīti āvajjanāvasī nevasaññānāsaññāyatanasamāpatti yatthicchakaṃ yadicchakaṃ yāvaticchakaṃ samāpajjati .pe. adhiṭṭhāti vuṭṭhāti paccavekkhati paccavekkhaṇāya dandhāyitattaṃ natthīti paccavekkhaṇāvasī imā pañca vasiyo taṃ ñātaṭṭhena ñāṇaṃ pajānanaṭṭhena paññā tena vuccati dvīhi balehi samannāgatattā tayo ca saṅkhārānaṃ paṭippassaddhiyā soḷasahi ñāṇacariyāhi navahi samādhicariyāhi vasībhāvatāpaññā nirodhasamāpattiyā ñāṇaṃ.