[9] |9.593| Padumuttarasambuddhaṃ lokajeṭṭhaṃ vināyakaṃ buddhabhūmiṃ anuppattaṃ paṭhamaṃ addasaṃ ahaṃ. |9.594| Yāvatā bodhiyā mūle yakkhā sabbe samāgatā sambuddhaṃ parivāretvā vandanti pañjalīkatā. |9.595| Sabbe devā tuṭṭhamanā ākāse sañcaranti te buddho ayaṃ anuppatto andhakāratamonudo. |9.596| Tesaṃ hāsaparetānaṃ mahānādo avattatha kilese jhāpayissāma sammāsambuddhasāsane. |9.597| Devānaṃ giramaññāya vācāya samudīritaṃ haṭṭho haṭṭhena cittena ādibhikkhamadāsahaṃ. |9.598| Mama saṅkappamaññāya satthā loke anuttaro devasaṅghe nisīditvā imā gāthā abhāsatha. |9.599| Sattāhaṃ abhinikkhamma bodhiṃ ajjhagamaṃ ahaṃ idaṃ me paṭhamaṃ bhattaṃ brahmacārissa yāpanaṃ. |9.600| Tusitāhi idhāgantvā yo me bhikkhaṃ upānayi tamahaṃ kittayissāmi suṇātha mama bhāsato. |9.601| Tiṃsamatte kappasahasse devarajjaṃ karissati sabbe deve abhibhotvā tidivaṃ āvasissati. |9.602| Devalokā cavitvāna manussattaṃ gamissati sahassadhā cakkavatti tattha rajjaṃ karissati. |9.603| Kappasatasahassamhi okkākakulasambhavo gotamo nāma gottena satthā loke bhavissati. |9.604| Tidasā so cavitvāna manussattaṃ gamissati agārā pabbajitvāna chabbassāni vasissati. |9.605| Tato sattamake vasse buddho saccaṃ kathessati koṇḍañño nāma nāmena paṭhamaṃ sacchikāhiti. Itthaṃ sudaṃ āyasmā aññākoṇḍañño thero imā gāthāyo abhāsitthāti. Aññākoṇḍaññattherassa apadānaṃ samattaṃ.