[100] |100.45| Siddhatthassa bhagavato adāsiṃ paṇṇasantharaṃ samantā upakārañca kusumaṃ okiriṃ ahaṃ. |100.46| Pāsāde ca guhaṃ rammaṃ anubhomi mahārahaṃ mahagghāni ca pupphāni sayanebhivassanti me. |100.47| Sayanehaṃ tuvaṭṭāmi vicitte pupphasanthate pupphavuṭṭhi ca sayane abhivassati tāvade. |100.48| Catunavute ito kappe adāsiṃ paṇṇasantharaṃ duggatiṃ nābhijānāmi santharassa idaṃ phalaṃ. |100.49| Ṭhitāsanthārakā nāma sattete cakkavattino ito te pañcame kappe uppajjiṃsu janādhipā. |100.50| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā senāsanadāyako thero imā gāthāyo abhāsitthāti. Senāsanadāyakattherassa apadānaṃ samattaṃ.