[141] |141.60| Migarājā tadā āsiṃ abhijātosu kesarī giriduggaṃ gavesanto addasaṃ lokanāyakaṃ. |141.61| Ayaṃ nu kho mahāvīro nibbāpeti mahājanaṃ yannūnimaṃ upāseyyaṃ devadevaṃ narāsabhaṃ. |141.62| Sākhaṃ sālassa bhañjitvā sakoṭaṃ pupphamāhariṃ upagantvāna sambuddhaṃ adāsiṃ pupphamuttamaṃ. |141.63| Ekanavute ito kappe yaṃ pupphamabhiropayiṃ duggatiṃ nābhijānāmi pupphadānassidaṃ phalaṃ. Itthaṃ sudaṃ āyasmā sāladāyako thero imā gāthāyo abhāsitthāti. Sāladāyakattherassa apadānaṃ samattaṃ.