[153] |153.1| Candaṃva vimalaṃ suddhaṃ vippasannamanāvilaṃ nandibhavaparikkhīṇaṃ tiṇṇaṃ loke visattikaṃ. |153.2| Nibbāpayantaṃ janataṃ tiṇṇaṃ tārayataṃ muniṃ vanasmiṃ jhāyamānantaṃ ekaggaṃ susamāhitaṃ. |153.3| Bandhujīvakapupphāni laggitvā suttake ahaṃ buddhassa abhiropesiṃ sikhino lokabandhuno. |153.4| Ekattiṃse ito kappe yaṃ kammamakariṃ tadā duggatiṃ nābhijānāmi buddhapūjāyidaṃ phalaṃ. |153.5| Ito sattamake kappe manujindo mahāyaso samantacakkhu nāmāsiṃ cakkavatti mahabbalo. |153.6| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā bandhujīvako thero imā gāthāyo abhāsitthāti. Bandhujīvakattherassa apadānaṃ samattaṃ.