[154] |154.7| Parakammāyane yutto aparādhaṃ akāsahaṃ vanantaṃ atidhāvissaṃ bhayaverasamappito. |154.8| Pupphitaṃ pādapaṃ disvā piṇḍibandhaṃ sunimmitaṃ tambapupphaṃ gahetvāna bodhiyaṃ okiriṃ ahaṃ. |154.9| Sammajjitvāna taṃ bodhiṃ pāṭaliṃ pādaputtamaṃ pallaṅkaṃ ābhujitvāna bodhimūlaṃ upāvisiṃ. |154.10| Gatamaggaṃ gavesantā āgañchuṃ mama santikaṃ te ca disvānahaṃ tattha āvajjiṃ bodhimuttamaṃ. |154.11| Vanditvā ca ahaṃ bodhiṃ vippasannena cetasā anekatāle papatiṃ giridugge bhayānake. |154.12| Ekanavute ito kappe yaṃ pupphamabhiropayiṃ duggatiṃ nābhijānāmi bodhipūjāyidaṃ phalaṃ. |154.13| Ito ca tatiye kappe rājā sammasito ahu sattaratanasampanno cakkavatti mahabbalo. |154.14| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā tambapupphiyo thero imā gāthāyo abhāsitthāti. Tambapupphiyattherassa apadānaṃ samattaṃ.