[163] |163.1| Padumo nāma nāmena dipadindo narāsabho pavanā abhinikkhamma dhammaṃ deseti cakkhumā. |163.2| Yakkhānaṃ samayo āsi avidūre mahesino yena kiccena sampattā ajjhāpekkhiṃsu tāvade. |163.3| Buddhassa giramaññāya amatassava desanaṃ pasannacitto sumano appoṭhetvā upaṭṭhahiṃ. |163.4| Suciṇṇassa phalaṃ passaṃ upaṭṭhānassa satthuno tiṃsakappasahassesu duggatiṃ nopapajjahaṃ. |163.5| Ūnatiṃse kappasate samalaṅkatanāmako sattaratanasampanno cakkavatti mahabbalo. |163.6| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti itthaṃ sudaṃ āyasmā supāricariyo thero imā gāthāyo abhāsitthāti. Supāricariyattherassa apadānaṃ samattaṃ.