[173] |173.1| Pabbate himavantamhi mahājātassaro ahu tatthajo rakkhaso āsiṃ ghorarūpo mahabbalo. |173.2| Kumudaṃ pupphitaṃ tattha cakkamattāni jāyare ocināmi cahaṃ pupphaṃ phalino samitaṃ tadā. |173.3| Atthadassī tu bhagavā dipadindo narāsabho pupphaṃ saṅkocitaṃ disvā āgacchi mama santike . |173.4| Upāgatañca sambuddhaṃ devadevaṃ narāsabhaṃ sabbañca pupphaṃ paggayha buddhassa abhiropayiṃ. |173.5| Yāvatā himavantasmiṃ yāva mālā tadā ahu tāvacchadanasampanno agamāsi tathāgato. |173.6| Aṭṭhārase kappasate yaṃ pupphamabhiropayiṃ duggatiṃ nābhijānāmi buddhapūjāyidaṃ phalaṃ. |173.7| Ito paṇṇarase kappe sattāhesuṃ janādhipā sahassarathanāmā te cakkavattī mahabbalā. |173.8| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā kumudamāliyo thero imā gāthāyo abhāsitthāti. Kumudamāliyattherassa apadānaṃ samattaṃ.