[17] |17.55| Nibbute lokanāthamhi sumedhe aggapuggale pasannacitto sumano thūpapūjaṃ akāsahaṃ. |17.56| Ye ca khīṇāsavā tattha chaḷabhiññā mahiddhikā tehaṃ tattha samānetvā saṅghabhattamakāsahaṃ. |17.57| Sumedhassa bhagavato upaṭṭhāko tadā ahu sumedho nāma nāmena anumodittha so tadā. |17.58| Tena cittappasādena vimānaṃ upapajjahaṃ chaḷāsītisahassāni accharāyo ahesu me. |17.59| Mameva anuvattanti sabbakāmehi tā sadā aññe deve abhibhomi puññakammassidaṃ phalaṃ. |17.60| Pañcavīsatikappamhi varuṇo nāma khattiyo visuddhabhojano āsiṃ cakkavatti ahaṃ tadā. |17.61| Na te bījaṃ pavappanti napi nīyanti naṅgalā akaṭṭhapākimaṃ sāliṃ paribhuñjanti mānusā. |17.62| Tattha rajjaṃ karitvāna devattaṃ puna gañchahaṃ tadāpi edisā mayhaṃ nibbattā bhogasampadā. |17.63| Na maṃ mittā amittā vā hiṃsanti sabbapāṇino sabbesaṃ ca piyo homi puññakammassidaṃ phalaṃ. Itthaṃ sudaṃ āyasmā pilindavaccho thero imā gāthāyo abhāsitthāti. Pilindavacchattherassa apadānaṃ samattaṃ.