[193] |193.1| Cullāsītisahassāni thambho sovaṇṇayo ahu devalaṭṭhipaṭibhāgaṃ vimānaṃ me sunimmitaṃ. |193.2| Tamālapupphaṃ paggayha vippasannena cetasā buddhassa abhiropesiṃ sikhino lokabandhuno. |193.3| Ekattiṃse ito kappe yaṃ kammamakariṃ tadā duggatiṃ nābhijānāmi buddhapūjāyidaṃ phalaṃ. |193.4| Ito vīsatime kappe candatittoti ekako sattaratanasampanno cakkavatti mahabbalo. |193.5| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā tamālapupphiyo thero imā gāthāyo abhāsitthāti. Tamālapupphiyattherassa apadānaṃ samattaṃ.