[199] |199.35| Giriduggacaro āsiṃ makkaṭo thāmavegiko phalinaṃ tindukaṃ disvā buddhaseṭṭhaṃ anussariṃ. |199.36| Nikkhamitvā katipāhaṃ viciniṃ lokanāyakaṃ pasannacitto sumano siddhatthaṃ tibhavantaguṃ. |199.37| Mama saṅkappamaññāya satthā loke anuttaro khīṇāsavasahassehi āgañchi mama santike. |199.38| Pāmujjaṃ janayitvāna phalahattho upāgamiṃ paṭiggahesi bhagavā sabbaññū vadataṃ varo. Itthaṃ sudaṃ āyasmā tindukadāyako thero imā gāthāyo abhāsitthāti. Tindukadāyakattherassa apadānaṃ samattaṃ.