[200] |200.42| Sumedho nāma bhagavā lokajeṭṭho narāsabho pacchime anukampāya padhānaṃ padahi jino. |200.43| Tassa caṅkamamānassa dipadindassa tādino girinelassa pupphānaṃ muṭṭhiṃ buddhassa ropayiṃ. |200.44| Tena cittappasādena sukkamūlena codito tiṃsakappasahassāni duggatiṃ nūpapajjahaṃ. |200.45| Tevīsatikappasate sunelo nāma khattiyo sattaratanasampanno eko āsiṃ mahabbalo. Itthaṃ sudaṃ āyasmā girinelamuṭṭhipūjako thero imā gāthāyo abhāsitthāti. Girinelamuṭṭhipūjakattherassa apadānaṃ samattaṃ.