[228] |228.29| Nārado iti me nāmaṃ kassapo iti maṃ vidū addasaṃ samaṇānaggaṃ vipassiṃ devasakkataṃ. |228.30| Anubyañjanadharaṃ buddhaṃ āhutīnaṃ paṭiggahaṃ vakulapupphaṃ paggayha buddhassa abhiropayiṃ. |228.31| Ekanavute ito kappe yaṃ pupphamabhiropayiṃ duggatiṃ nābhijānāmi buddhapūjāyidaṃ phalaṃ. |228.32| Catusattatito kappe romaso nāma khattiyo āmuttamālābharaṇo sayoggabalavāhano. |228.33| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā vakulapupphiyo thero imā gāthāyo abhāsitthāti. Vakulapupphiyattherassa apadānaṃ samattaṃ.