[245] |245.9| Jātassarassa vemajjhe vasāmi jalakukkuṭo athaddasaṃ devadevaṃ gacchantaṃ anilañjase. |245.10| Tuṇḍena kesaraṃ gayha vippasannena cetasā buddhassa abhiropesiṃ tissassa lokabandhuno. |245.11| Dvenavute ito kappe yaṃ pupphamabhipūjayiṃ duggatiṃ nābhijānāmi buddhapūjāyidaṃ phalaṃ. |245.12| Tesattatimhi kappamhi sattapattasanāmako sattaratanasampanno cakkavatti mahabbalo. |245.13| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā naḷinakesariyo thero imā gāthāyo abhāsitthāti. Naḷinakesariyattherassa apadānaṃ samattaṃ.