[253] |253.1| Devaloke ṭhito santo vipassissa mahesino dhammaṃ sutvāna mudito imaṃ vācaṃ abhāsahaṃ. |253.2| Namo te purisājañña namo te purisuttama bahujjanaṃ tārayasi desento amataṃ padaṃ. |253.3| Ekanavute ito kappe yaṃ vācaṃ abhaṇiṃ tadā duggatiṃ nābhijānāmi thomanāya idaṃ phalaṃ. |253.4| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā thomako thero imā gāthāyo abhāsitthāti. Thomakattherassa apadānaṃ samattaṃ.