[284] |284.5| Sinerusamasantoso dharaṇīdharasādiso vuṭṭhahitvā samādhimhā bhikkhāya mamupaṭṭhito. |284.6| Harītakiṃ āmalakaṃ ambaṃ jambuṃ vibhedakaṃ kolaṃ bhallātakaṃ bellaṃ phārusakaphalāni ca. |284.7| Siddhatthassa mahesissa sabbalokānukampino tañca sabbaṃ mayā dinnaṃ vippasannena cetasā. |284.8| Catunavute ito kappe yaṃ phalaṃ adadiṃ tadā duggatiṃ nābhijānāmi phaladānassidaṃ phalaṃ. |284.9| Sattapaññāsito kappe ekajjho nāma khattiyo sattaratanasampanno cakkavatti mahabbalo. |284.10| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā phaladāyako thero imā gāthāyo abhāsitthāti. Phaladāyakattherassa apadānaṃ samattaṃ.