[33] |33.1| Sattāhaṃ paṭisallīnaṃ sayambhuṃ aggapuggalaṃ pasannacitto sumano buddhaseṭṭhaṃ upaṭṭhahiṃ. |33.2| Vuṭṭhitaṃ kālamaññāya padumuttaraṃ mahāmuniṃ mahantaṃ kadalikaṇṇiṃ gahetvā upagañchahaṃ. |33.3| Paṭiggahesi bhagavā sabbaññū lokanāyako mama cittaṃ pasādento paribhuñji mahāmuni. |33.4| Paribhuñjitvāna sambuddho satthavāho anuttaro sakāsane nisīditvā imā gāthā abhāsatha. |33.5| Ye ca santi samītāro yakkhā imamhi pabbate araññe bhūtagaṇā sabbe suṇantu vacanaṃ mama. |33.6| Yo so buddhaṃ upaṭṭhāsi migarājaṃva kesariṃ tamahaṃ kittayissāmi suṇātha mama bhāsato. |33.7| Ekādasañca khattuṃ so devarājā bhavissati catuttiṃsatikhattuñca cakkavatti bhavissati. |33.8| Kappasatasahassamhi okkākakulasambhavo gotamo nāma gottena satthā loke bhavissati. |33.9| Akkositvāna samaṇe sīlavante anāsave pāpakammavipākena nāmadheyyaṃ labhissati. |33.10| Tassa dhammesu dāyādo oraso dhammanimmito kuṇḍadhānoti nāmena sāvako so bhavissati. |33.11| Pavivekaṃ anuyutto jhāyī jhānarato ahaṃ tosayitvāna satthāraṃ viharāmi anāsavo. |33.12| Sāvakehi parivuto bhikkhusaṅghapurakkhato bhikkhusaṅghe nisīditvā salākaṃ gāhayī jino. Itthaṃ sudaṃ āyasmā kuṇḍadhāno thero imā gāthāyo abhāsitthāti. Kuṇḍadhānattherassa apadānaṃ samattaṃ.