[347] |347.31| Himavantassavidūre hāriko nāma pabbato sayambhū nāma nāmena rukkhamūle vasī tadā. |347.32| Naḷāgāraṃ karitvāna tiṇena chādayiṃ ahaṃ caṅkamaṃ sodhayitvāna sayambhussa adāsahaṃ. |347.33| Catuddasesu kappesu devaloke ramiṃ ahaṃ catusattatikkhattuñca devarajjamakārayiṃ. |347.34| Sattasattatikkhattuñca cakkavatti ahosahaṃ padesarajjaṃ vipulaṃ gaṇanāto asaṅkhayaṃ. |347.35| Ubbiddhaṃ bhavanaṃ mayhaṃ indalaṭṭhīva uggataṃ sahassathambhaṃ atulaṃ vimānaṃ sappabhassaraṃ. |347.36| Dvesampattiṃ anubhotvāna sukkamūlena codito gotamassa bhagavato sāsane pabbajiṃ ahaṃ. Itthaṃ sudaṃ āyasmā naḷāgāriko thero imā gāthāyo abhāsitthāti. Naḷāgārikattherassa apadānaṃ samattaṃ.