[405] |405.45| Himavantassa avidūre asoko nāma pabbato tatthāpi assamo mayhaṃ visukammena māpito. |405.46| Sumedho nāma sambuddho aggo kāruṇiko muni nivāsayitvā pubbaṇhe piṇḍāya me upāgami. |405.47| Upāgataṃ mahāvīraṃ sumedhaṃ lokanāyakaṃ paggayha sugatapattaṃ sappitelaṃ apūrayiṃ. |405.48| Datvānāhaṃ buddhaseṭṭhe sumedhe lokanāyake añjaliṃ paggahetvāna bhiyyo hāsaṃ janesahaṃ. |405.49| Iminā sappidānena cetanāpaṇidhīhi ca devabhūto manusso vā labhāmi vipulaṃ sukhaṃ. |405.50| Vinipātaṃ vivajjetvā saṃsarāmi bhavābhave tattha cittaṃ paṇidhitvā labhāmi acalaṃ padaṃ. |405.51| Lābhā tuyhaṃ suladdhante yaṃ maṃ addakkhi brāhmaṇa mama dassanamāgamma arahattaṃ gamissati . |405.52| Vissaṭṭho hohi mā bhāyi adhigantvā mahāyasaṃ mamaṃ hi sappiṃ datvāna parimokkhāsi jātiyā. |405.53| Iminā sappidānena cetanāpaṇidhīhi ca devabhūto manusso vā labhāmi vipulaṃ sukhaṃ. Kiṃ kusalaṃ gavesanto bāvariṃ upasaṅkamiṃ. |405.59| Tattha mante adhiyāmi chaḷaṅgaṃ nāma lakkhaṇaṃ tamandhakāraṃ vidhamaṃ uppajji tvaṃ mahāmuni. |405.60| Tava dassanakāmohaṃ āgatomhi mahāmuni tava dhammaṃ suṇitvāna pattomhi acalaṃ padaṃ. |405.61| Tiṃsakappasahassamhi sappiṃ buddhassadāsahaṃ etthantare nābhijāne sappi viññāpitaṃ mayā. |405.62| Mama saṅkappamaññāya uppajjati yathicchakaṃ cittamaññāya nibbattaṃ sabbe santappayāmahaṃ. |405.63| Aho buddhā aho dhammā aho no satthusampadā thokañhi sappiṃ datvāna appameyyaṃ labhāmahaṃ. Itthaṃ sudaṃ āyasmā mettagū thero imā gāthāyo abhāsitthāti. Mettaguttherassa apadānaṃ samattaṃ.