[409] |409.184| Pabbhārakūṭaṃ nissāya anomo nāma tāpaso assamaṃ sukataṃ katvā paṇṇasāle vasiṃ tadā. |409.185| Siddhaṃ tassa tapokammaṃ siddhipatto sake bale sakaṃsāmaññavikkanto ātāpī nipako muni. |409.186| Visārado sasamaye paravāde ca kovido paṭṭho bhūmantalikkhasmiṃ uppādamhi ca kovido. |409.187| Vītasoko nirārambho appāhāro alolupo lābhālābhena santuṭṭho jhāyī jhānarato muni. |409.188| Piyadassī nāma sambuddho aggo kāruṇiko muni satte tāretukāmo so karuṇāya phari tadā. |409.189| Bodhaneyyaṃ janaṃ disvā piyadassī mahāmuni cakkavāḷasahassamhi gantvā ovādako muni. |409.190| Mamuddharitukāmo so mamassamamupāgami na diṭṭho me jino pubbe na sutopi ca kassaci. |409.191| Uppādā supinā mayhaṃ lakkhaṇā suppakāsitā paṭṭho bhūmantalikkhasmiṃ nakkhattapadakovido. |409.192| Sohaṃ buddhassa sutvāna tattha cittaṃ pasādayiṃ tiṭṭhanto vā nisinno vā sarāmi niccakālikaṃ. Itthaṃ sudaṃ āyasmā hemako thero imā gāthāyo abhāsitthāti. Hemakattherassa apadānaṃ samattaṃ. Aṭṭhārasamaṃ bhāṇavāraṃ.