[49] |49.88| Siddhatthassa bhagavato mettacittassa tādino sayanaggaṃ mayā dinnaṃ dussabhaṇḍena atthataṃ. |49.89| Paṭiggahesi bhagavā kappiyasayanāsanaṃ uṭṭhāya sayanā tamhā vehāsaṃ uggamī jino. |49.90| Catunavute ito kappe yaṃ sayanamadāsahaṃ duggatiṃ nābhijānāmi sayanassa idaṃ phalaṃ. Itthaṃ sudaṃ āyasmā sayanadāyako thero imā gāthāyo abhāsitthāti. Sayanadāyakattherassa apadānaṃ samattaṃ.